Jch her lippolt van bredow ridder . voget mẏns herren des marcgreuen tuͦ brandemborch sakeweldi=/ge vnd wi tideke sprenwold . vnd bertram hase borgen : bekennen vnd betuͦgen in dissen o=/penen brẏue . vor allen guͦden luͦden dar hy vorkuͦnpt¹ . dat wi sculdich sint van recht(er) / scult . mẏt eyner rechten samenden Hant . den eerliken wisen luden . den ratmannen tuͦ / prymzslaw dẏ nu sint vnd dẏ noch werden moͤgen . huͦndert mark stetinscher pe(n)ni(n)ge / van deme gwi(n)ne dat pet(er) ang(er)muͦnde gewan tuͦ strateborch . vnd dar wi vul vor / hebben : dẏ wil wi vnd scolen en betalen vp suͦnte walburgen dach dẏ negest tuͦ / kuͦmpt suͦnder allerleẏe argelist : w(er)et dat wi des nichten deden . wat redelekes / scaden sẏ dar v(m)me nẏmen vp kisten pant dar loue wi sẏ aff tuͦ nemende . w(er)et / ok dat vns(ir) {vnß} eẏn aff ginge eer dẏt gelt bereyt wert des god nichten geue . so loue wi / eynen andern also gewis bẏnnen vyr weken in des doden stede tuͦ settende . dẏ scal sin / ingesegel in des doden ingesegels stede hengen mẏt eyme brẏue dar hẏ gelouedes in be=/ke(n)net . vnd dar mẏt scal disse briff vngebroken . vnd vngeerghert wesen : vnd w(er)et dat / wi des nichten endeden bynnen den vyr weken so scole wi dẏ leuendich bliuen . des doden an=/deẏl bẏnnen den andern negesten vyr weken bereyden mẏt reden pe(n)ningen odir myt nuͦ=/gaffagen panden . dẏ sẏ tuͦ (christ)en odir tuͦ ioden moͤgen setten vor also vele geldes suͦnd(er) / tuͦ boͤrgen . vnd w(er)et dat bẏnnen der tid iergende gelt velle van mẏns herren wegen van / dingnissen odir van geuangen . odir anders wor vm . dar scolen sẏ dẏ yrsten tuͦ wesen / vp tuͦboͤrende vor yre scuͦlt : Tuͦ tuͦge vnd eyner merer bekenntnisse al diss(er) vorscreuen / stuͦcken hebbe wi vorgena(n)ten . her lippolt . tideke vnd bertram vns(er) aller ingesegele mẏt / gantzer witscap vnd vulbort an dissen briff laten hengen dy geuen is tuͦ pr(e)nzslaw {p(re)mzlaw} / na godes bort druͦtteynhuͦndert iar in deme eyn vnd achtentichsten iare des vrijdages / vor Exurge quare obdormis