Jk eghart melmeker boͮkenne an mẏnen openne brẏeue dat mẏn muͦder ermegart vnde ik / eghart vorgeuen hebben den baruoten bruͦderen in der stat thuͦ premzlow eyn bra(n)denborg(er) punt / dar scolen sy af thugen eẏne thunne wines vnde teẏn scillinge brandenborg(esch) tuͦ oblaten vn(de) / den pewleren ẏnder seluen stat teẏn scillinge brande(n)borgesche pennẏnghe tuͦ oblaten dat geẏlt / scolen sẏ an beẏnden cloͮsteren nemen ẏn deme dorpe tuͦ clẏnkow vppe eẏme houe vnde vppe den / thwen huͦven dẏ dar thuͦ liggen dar vormals thẏde albreẏchtes vppe sat vnde nuͦ struwe {struve} vppe sit / dat voreyghent ẏs van mẏnen heren deme markgreuen deme roͮmer den goht ghenedich sẏ . / vormeẏr so gheve ik vornuͦmede eghart vn(de) clauͦs melmeker myn sone . vn(de) anna mẏne dochther / dẏ thẏdeke scroͮder heft vn(de) vrsula myne dochtere dẏ etszel heft . den vorsprokenen baruoten bruͦ=/deren ẏnder seluen stat tuͦ prempzlow eẏnen haluen steẏn wasses tuͦ ghodes dẏnste vp thuͦnemen / de van deme chruͦge thuͦ sconenw(er)der dat ghut voͤrlathe ik dẏ vornuͦmede thwe punt brandenborg(esche) / vn(de) den haluen steẏn wasses yk vakegenuͦmede eghart vn(de) mẏne vorgenuͦmede ky(n)dere alsoͤclaus / anna vn(de) ursula tuͦ der ewicheyt luͦtterliken dorch ghot vn(de) dorch mẏner muͦder sẏele wille vn(de) mẏn(er) / vn(de) mẏner kẏndere . Desse vorsprokene almẏssen tuͦ den wine vn(de) oblaten vn(de) dat vornuͦmede was scolen / desse vornuͦmede broͮdere alle ẏar ewich vpboͤren tuͦ suͦnte mertens dage vn(de) wes dar ouerloppet / van reẏnthe wegen dat beͦholde ẏk vp den vorsprokene houe vn(de) den thwen huͦuen dẏ dar thuͦ ligge(n) / Dat dẏt blẏue(n) scal thuͦ eẏner ewicheẏt . dat thuͦge ẏk eghart melmeker . claus mẏn sone . thẏdeke / scroͤder . vn(de) etszel dẏ mẏne doͤchtere hebben . Vn(de) thuͦ eẏner groͤter buͦwaringe so hebbe wẏ vornuͦmede / thuͦge met vnser witscap vnse ẏngezegel an dessen brẏf ghehangen etc Desse bryf ẏs gegeuen na / godes bort duzent ẏar drẏhundert ẏar ẏn deme sesvndeachdentẏchste(n ) ẏare ẏn deme mandage na / deme anderen suͦndage ẏn der vastene