Wir Jost von gotes gnaden Marggraff vnd herre zu Mechern? Bekennen vnd tun kunt offenlich mit disem breffe allen / den die yn sehen ader horen lezen , das wir vnsern burgern der Stat czu prymtslaw die nu sein vnd noch komend sein vnsern liben / getrewen beuestet vnd bestetiget yn mit disem briue alle ire freiheit alle ire rechtikeit vnd alle ire / alde gewonheit vnd wollen vnd sullen sie lassen vnd behalden bei eren vnd genaden dar si in vorgangen tzeiten sein gewesen , Ouch / wollen wir vnd sollen yn halden alle ire briue die sie haben von fursten vnd furstinnen vnd wollen vnd sollen sie sunder allerlei / hindernisse lassen vnd behalden mit aller gnaden mit aller freiheit vnd rechticheit bei allen iren eygen lehen vnd erben , als sie / das vorgehabt haben vnd besessen Auch wollen wir vnd sollen Ritter . knappen , Burgern vnd geburen mit allen Leuten ge=/menilichen beid geistlich vnd wertlich halden alle ire briffe vnd wollen sie lassen bei irer vreiheit bei allen rechten vnd gnaden / Ouch sullen vnd wollen wir vnd vnser nachkomelingen des mitnichte tzustaten volborden noch gunnen das sie oder ir nachko/meling(e) bi ? irer stat geladen werden an vmb hantefftige getad sunder sie sullen zu rechte stein fur iren schulten , wer es auch / das yn ader iren nachkkomelinge eynige briffe vorgiengen ader vorgangen weren die sullen vnd wollen w(i)re vnd vnser nach=/komelinge von worten zu worten noch dem laute der briue als sie gewesen sein widergeben vornewen vnd bestetigen ane giffe / vnd ane gabe , vnd auch das sie von vnsern amptluten nyminer inkemen tzeiten gevoret gehindert ader getrenket noch von / der marke vorweiset sollen worden in dhemerweis , Sunder sie sullen do bei vnehindert vngewret vnd vngekrenket ewiclich en / bleiben in all der masse , als sie von alders her gewesen sein , vnd als sie des von vnsern vorfaren marggrauen czu Brandenb(ur)g / briue haben , mit vrkunt dicz briues vorsigelt mit vnserm anhangunden Ingesigel der geben ist zu prymslaw noch / Crists geburt dreiczenhundert Jare dornoch in dem achtvndachtzigsten jare , des nechsten mantags vor sant Egidius tagh