Wÿ Olrich von der ghenade godes Greue to Reghensteyn . vn(de) vnse Erven wy bekennen oppenbare vn(de) betvghen in dysseme . breve . Dat wy vns nach vnser herren vn(de) nach / vnser vruͦnde rade . myt ghvͦden wẏllen . hebben vor lẏket vn(de) vor sonet . mẏt deme Rade vn(de) mẏt den Buͦrgheren vt der Alden stat to Quedelvngheb(or)g . Alsus alse hyr na ghescreven / staͤt vmme allen werren vn(de) twẏdragt . de vnder vns was vn(de) vn(der) den boͮrgheren to Quedelvngheb(or)g . Dat wẏ scolen vn(de) wyllen se vor deghedynghen . an allen yͤren noden vn(de) scolen / se nerghen hẏnderen an velde . noch dorpe . an watere noch an weẏde . boven recht . Vn(de) wẏ vn(de) vnse voghede vn(de) vnse ghesynde . wy ne scolen se nẏcht an verden an erme lẏve vn(de) an erme / gvͦde weder kersten noch Jvͦden . vn(de) scolent halden alse et von aldere stan heuet . Weẏrt vns icht to den borgheren wy scolen se vor klaghen vor deme Rade . oder vor deme rychte . / synt se schuldych se scolen sych mẏt vns vor lyken . nach ghe nade oder nach rechte . synt se vnschuldẏch so scole wy recht von en nemen . Weyrt och den vor benomeden borgheren icht / to vnseme synde de scole wẏ en weder to rechte setten . vn(de) wẏ be kennen des . vmme dat ghe Rychte vn(de) de vysscherige . twysschen d(er) alden stat vn(de) d(er) Nẏen dat scal de alde stat / be halden . vn(de) de vt d(er) Nyen stat scolen ere wyden vn(de) ere hecghe be halden alse se nv stan . vn(de) de daͤmme scal men halden also se von aldere hebben ghewesen . vn(de) wy ne scolen / neynen nyen tollen maken noch neyne vnredelike pandinghe . vnse voghede noch vnse ghe synde scal nicht voderen vppe der Borghere ghvͦde . Twẏschen d(er) alden stat vn(de) der Nẏen . scal neẏn / taverne wesen . Dat gresels hus heuet von aldere wesen . dat scal in deme westendorpe de neste taverne der stat sẏn . veret . Jenichman inde stat de vnse eyghen nicht en ẏs . des scole wẏ / staden mẏt ghvden wyllen hebbe wẏ auer denest vppe sime ghvͦde hat . dat scole wẏ behalden . vn(de) wat wẏ vnwẏllen hebben . de von des Marchgreven vogheden ghe komen ẏs vmme / yͤre ve . vn(de) vmme ere perde . vn(de) och vmme allen eren scaden . Dat scole wẏ vor deghedynghen also verre also ere recht weret . Swat vor svmet ys an ghe richte vn(de) an vronen tẏnse / vn(de) an allen dinghen . dat ys mẏt vns vrvntlychen hyn ghe leghet . Wy ne scolen neyne nẏe Borg eder hus bvwen Quedelvngheb(or)g vppe eyne myle na et en sy mit der Borgher willen / wy scolen dat dẏnch seluen sẏtten . vn(de) eyn ratman bẏ vns . De Bvͦrghere scolen neẏn nẏe lovede setten dat vns . schedelich sy to vnseme rechte . noch vnseme richtere . vn(de) / wy scolen de bvͦrghere laten by erme alden rechte . vn(de) se scolen vns laten by vnseme alden rechte . Jn eyn orkvnde desser deghedẏnghe de hyr vor be screven sẏnt vn(de) eẏner / sycherheẏt aler dẏnghe . vn(de) dat es neẏn not mer ghe sche . hebbe wẏ greue Olrich von Reghensten . vn(de) vnse vrvnde de Edelen h(er)ren greve Otte von valkensteẏn h(er) Gardvn / von hademersleue . Greue henrich von honsten de Eldere . greue Burchart von Mansvelt . greue Conrat von w(er)ny(n)gherode . greue Olrich to Reghensten de Jvnghere . hebbe wy alle vnse / ynghesyghele to desseme breue ghehenghet Tughe desser sone vn(de) deghedynghe . synt de edelen h(er)ren . greue Otte von valkensten . h(er) gardvn von hademersleue . De vor nomene riddere / h(er) albrecht von dem b(er)ghe . h(er) godel de voghet . vn(de) de achbaren knegte . Otte sconehals . henrich von atesleue . vn(de) ande(re) biderue lude . Desse Bref ys ghe gheven na godes bort / Dvsent Jar dre hvndert Jar . Jn deme sesteynden Jare Lateren daghe svnte Johannes ante portam latẏnam