We borghe(r)meste(re) .. radmanne vnde borghe(re) gemene in der Olden stad to Quede=/lingebuͦrch bekennen indiseme openen breue vnde don wetlik allen de en seen / vnde horen dat we os hebben gedan to vsen leuen vrunden deme rade vnde / den borghe(re)n gemene to asch(er)sleue ewichliken bi en tobliuende to al iren noden , we(ret) / dat se ienich man dringen welde eder hinde(re)n an irme rechte , dat scollet / se os wetten laten des scolle we recht vor se beden verteẏn nacht , weret dat / we en nenes rechtes helpen konden noch ne mochten . so scolle we en tohulpe sin / mit alledeme dat we vormoghen , up vse kost vnde vse auenture , dat sulue / scollen se os weder don , to enem orkunde diser dinge hebbe we vser stad .. / jngeseghel hengt to disem breue , De is ge screuen vnde geuen na godd(es) bort / dusent jar drehund(er)t jar indeme ses vnde twintegesten jare , indeme he(re)n / daghe sentte tiburtius vnde sentte valerianus