Wie Niclaus van der gnade goddes prouest . Jacob prior . Henrik cuͦster . vnde de gantze sammenunghe des goddeshuses / to sente wiprechte vor der alden stad to quedelingeborch . don witlik vnde bekennen jn dissem breue alle den de dissen brif / lesen oder horen . dat wie de molen twisghen der alden vnde der nẏgen stad to quedelingeborch hebben vorkoft . vnde / ghelaten Redeliken den Erbaren luͦden den Ratmannen beẏder stede to quedelingeborch to der seluen stede hant . / beẏde . Eghen . len . tins . vnde allent dat wie jn der voreghenomeden molen hadden ewichlichen to besittende mit allem / Rechte . dit hebbe wie ghedan mit Rade vnde mit volbort der louesammen vnser vrowen vrowen jutten der ebdisghen / to quedelingeborch , vnde mit alle der Rade vnde volbort der volbort vnde Rad dar to horde . vordmer wie scolen vnde / willen Rechte were sin den steden jn disser molen vor allen luͦden wor vnde wanne mant van os esghet . vordmer / wie hebben vorteghen vnde vortigen mit gudem willen jn dissem breue , der vore nomeden molen vnde alle des dat / wie jn disser molen hebben vore ghehat . vordmer wie vorsaken ok alles Rechtes . aller Huͦlpe . vnde allerhande list . dar / wie disse dikke ghenomeden stede jnder molen mede hinderen mochten , ofte jemant van vnser weghene . Disse / ding hebben ghe deghedinget de duchtighen Riddere , her heẏneke van Adessleue . vnde her peter van ci(m)menstede . / vnde he(n)ning van euessum en knape . van vnser weghene . vnde claus van hasleuelde . b(er)nhard van bekheẏm . vnde / hannes dolenvuͦt . van der stede weghene . dit is ghe schen vnde voltoghen , Jn der tgeghenwerdicheẏt der Edelen / herren greuen albrechtes vnde greuen bernhardes der broͮdere van Reghensteẏn . vnde des edelen h(er)ren albrechtes / van Hakeborne . vnde sines sones Albrechtes . vnde conrades van wighenrode . heẏneken van vrose knapen . vnde dar / to vele bederuer luͦde van papen vnde leẏgen , der truͦwe wol ghe proͮvet is . To ener betuͦghinge vnde to ener ewighen / haldunghe disser ding , van vnser vnde vnser nakomelinghe weghene . vnde to ener vollenkomener openbarichheyt / hebbe wie ghebeden vnde behalden dissen tgeghenwardighen brif werden ghevestet mit dem jngheseghele der / louesammen vnser vrowen . vrowen jutten der ebdisghen to quedelingeborch . Also wie ene ok mit vnsen jngheseghelen / hebben beseghelt laten . vnde wie jutta van der gnade goddes , ebdisghe des werldiken goddeshuses to quedeli(n)geb(o)rch / dorch der bede willen der Herren des prouestes , vnde des couentes to sente wiprechte , hebbe wie disse scrift mit / vnsem jngheseghele , na goddes bort dusent jar drehundert . jn deme twe vnde dritteghestem jare jn deme lat(er)en / daghe goddeslichhammen beseghelt , Jat ,