We Siuerd van hoẏm canonik des goddeshuses vns(er) vrowen to halu(er)stad . Bartold p(er)re(re) toͮ sente egidio . Ludolf vicarius toͮ sente bened(ic)to / werner vicarius to sente blasio . Joh(ann)es perre(re) to sente nẏcolao to quedelingheborch . bekennen vnde betughen openberliken in dissem breue / dat bodo buser vnde Junghe hans ghenomet meẏsterjan op ene half sic hebbet mit vrigem wilkore vorenet vnde berichtet / ghenzliken vnde vruntliken . mit den Erbaren luden . den borghermesteren . deme Rade . vnde der Stad Quedelingheborch . vnde / mit conrade grozzen . vnde mit olden Hanse Mest(er)janes borgheren dar selues . vnde mit alle den de , de selue sake roret oppe / de anderen half . vmme dat erue Reẏneken wedewen Mesterjanes . vnde de ansprake de junghe hans mesterjanes hadde / oppe de varendenhaue der seluen vrowen . vnde vmme den broke des de rad boden busere schuͦldeghede . vnde dat / bodo busere dar vmme was opghehalden . dat is allent vruͦntliken hen ghelecht jn disser wis . Dat olde hans mesterjan / let junghen hanse vnde siner suͦster Greten ene halue mark gheldes wersilueres vd sineme Erue Bi der scole in der alden / stad . mit twen schillingen grossen vnbeworrens dinges to beredende . jn veir tẏden . alle jar . op sente micheles dach . op de wẏnach/ten . paschen . vnde sente ioh(ann)es dach baptisten . jn jowelker tẏd ses grossen . Dar toͮ ghift en de rad toͮ vruntscap vnde toͮ leve . vere / vnde twintich schillinghe grossen . hir vmme . dat ninerhande krich noch werre mer hir van enwerde . Dat disse sone ganz vnde / stede werde ghehalden . so hebben disse seluen bode vn(de) hans . na der tẏd dat bode was ledich vnde los gheworden . vn(de) mit en vn(de) vor se / Bernard van orden . vn(de) b(er)nard vette borghe(re) to quedelingheborch ghelouet mit henden vn(de) mit mu(n)de . in guͦden truͦwen vnbedwugens dingens disse / sone vn(de) disse vruntscapt ewichliken to haldende ane allerhande list . vn(de) vorbinden sik dar to mit vrigeme wilkore bẏ der stad huͦlden . vn(de) vor/tẏgen aller ansprake de se hebben mochten to samene efte erer jowelk allene . mit rechte oder ane recht tgeghen de stad . oder ande(re) p(er)sonen . van disser / sake weghene . ghistlik ofte werlik . js en auer den [...] ¹ schuͦldich der sake sint hir vd ghesproken .vmme de sake moghen se beẏde ofte erer / jowelk bisundern komen vor den rad . wene se schuldeghen willen . den [ou]er de . scal en de Rad [bescreuen] wes man en bekant . des scal en de rad / helpen dat de jenen sik mit en berichten binnen veir weken . wes men en vorsikt . willen se der lude recht . dat is . eren eẏd nemen den scolen se en / duͦn . enwillen se des nicht nemen . so scolen se ere recht vord(er)en . vor deme ghistliken richtere . binnen quedelingheborch. efte dar en richt(er)e is . vortmer / wil junghe hans mesterjan oder sin suͦster ofte ere eruen de haluen mark gheldes laten . wil se olde hans mest(er)jan ofte sine eruen ghelden / vor sodan ghelt alse se en bẏ anderen luden ghelden mach des scal man en guͦnnen . en is des nicht . so mach he vn(de) sin suͦster . ofte ere eruen / de Guͦlde vorkopen weme se willen To ener betughinge alle disser ding hebbe we vnse jngheseghele ghehe(n)get to dissem breue . vn(de) we / borghermeste(re) . vn(de) rad . jnni(n)ghemeste(re) . Menheẏt mestere op ene half . vnde we bodo buser . junghe hans mest(er)jan . B(er)nhard van orden . vnde / b(er)nhard vette op de anderen half . bekennen des dat alle de stuͦcke de hir vore ghescreuen sint dat de sin ghededinget mit vseme willen / vnde sint war . vnde vorbinden os mit guͦden truwen . ane allerhande list . alle disse vore bescreuenen stuͦcke ganz vnde stede to haldene / To ener betughinge disser ding hebbe we dissen bref besegheled mit vnsen jngheseghelen Na goddes bord dretteẏnhundert jar jn deme / twe vnde vertighesten jare des neghesten daghes na sente joh(ann)is daghe baptisten to middeme somere