We des Rades meste(re) . De Rad . Jnnighemeste(re) . Der Menheyt meste(re) . vn(de) de gantze menheyt der borghe(re) / beyder stede Quedelinghb(or)ch bekennen apenbare in desseme breue Dat we os endrachtliken vorbvnden / vn(de) vor enet hebben ewichliken . mit den erbaren mannen vnsen vruͦnden deme Rade vn(de) den borghe(re)n ghemene der / stad tov Asch(er)sleue in desser wise also hir na ghescreue(n) sted . welk vorste greue here . Rydd(er)e . knecht . odir wer he were / se vorvnrechtede vn(de) ere vyghent worde wanne se vns dat vorkvndeghen dat on dat vnrecht wed(der)vare also dat se dat / vorstan willen mid erme rechte . so schole we vn(de) willen des neysten daghes darna . also se dat von vns gheeschet hebben / vntsegghen vn(de) vyghent w(er)den . der odir des . vn(de) willen on behulpen wesen mit allen truwe(n) . Were ok dat on en openbare / nod anstvͦnde vn(de) se volghe von vns escheden . so scholle we vn(de) willen binnen den neysten ver daghen en volghen mit alle / deme dat we vormogen . Were ouer dat se beleghen eder vorbvͦwed worden eder se de vyghande drunghe(n) eder / ghedru(n)ghen worden von den vyghenden dar me sik vrome(n) odir schaden vormuden mochte So scholde we wanne se vns / escheden von stad an volghen on ok mit alle dem dat we vormochten . Were dat we nicht vntsegheden vn(de) nicht on be/hulpen worden bynne(n) der vorghesprokene(n) tid . so schol we on vor den ersten dach gheue(n) vn(de) bereden hvnd(er)d mark / stendalsches silue(re)s . dar na jo vor jowelken dach voͤftych mark ok stendalsches silue(re)s also langhe wante we vntseg=/gen vn(de) on behulpen w(or)den . Were ok dat we nicht envolgheden also we na dessen breue(n) plichtich sin . so scholle we / on ok geuen yo vor den dach alsodan gheld also hir vorghescreuen is . de wile dat on der volghe nod were Ok / enscholle we noch vnser borghere nen de vyghende an yenegherhande(n) stokken sterken odir vorde(re)n . worde / we dar vm(m)e ghescholdeged dar we nyͤn recht vore don enwolden . So scholde we on vor den broke gheuen vef/tus(ent) mark stendalsches silue(re)s . Worde ok gennich vnser borghere bysvnd(er)n dar vm(m)e . beschuldeghed dat he de / vyghende ghevorderd hedde dar he sin recht nicht vor dvn enmochte odir endorfte . de scholde vorbored hebbe(n) / drettych mark stendalsches silue(re)s . der scholde(n) vns teyne tov vnser stad nvd . den von halberst[a]d vnsen vrunden / teyne . vn(de) den von assch(er)sle(ue) teẏne , we des geldes nicht geuen enmochte oder wolde . den scholde we vor wysen vn(de) / he scholde desser vorbenomeden stede vnwillen hebben vn(de) vnbern . also langhe wanthe he dat vorbenomede geld / beredde . Vordmer alle de stukke vnser alden breue de we on ghegheue(n) hebben vn(de) anderer breue de de / stede vnd(er) enander ghegeue(n) hebben de hir nicht gheschreue(n) sint de wil we stede vn(de) vnghewandeld halden / Dat desse dingh in allen stukken stede vn(de) ganz von vns vn(de) vo(n) vnsen nakomelinghen ewichliken ghe/halden w(er)den hebbe we ghe geue(n) dessen bref truweliken ghevestened mit vnser stede Jngheseghele / Na goddes bord dretteynhund(er)t jar in deme dre vn(de) verthegesten jare in sente katherine(n) auende der juͦnkvruwe(n)