Ek vridze von heͦym de junghe(re) . vedd(er)e he(re)n konema(n)nes von heͦym des ridd(er)es beke(n)ne jn disseme / yeghe(n)wardighen breue . Dat ek afgheborghed hebbe vn(de) sculdich bin ysr(ae)l deme joden tuͦ Que/delingb(or)ch . aronne heseken vn(de) ysacke sine(n) sonen vn(de) anderen sinen rechten erue(n) ses schok / krossen oppe redelike(n) woker en dar op tuͦ gheuende . Dat houetguͦd vn(de) wok(er) hebbe ek gholoved / vn(de) love jn dissem breue vn(de) vor mek vn(de) med mek her koneman von hey(m) de ridd(er)e vn(de) vrederik / von heͦym knecht brod(er)e mine vedderen den ghenomeden jodden tuͦ betalende wan(n)e se des nicht / enberen enwillen oder jn der stad tu Quedlingb(or)ch recht jn legher en lesten also langhe wante se / wol vn(de) al betal(et) worden ed enwe(re) med erem willen vn(de) dat silue enscholde den woker nicht / min(n)eren Dat disse dingh den vorbenomeden jodden wol ghehalde(n) w(er)den hebbe ek en ghegheue(n) / dissen bref med mineme vn(de) med miner vedd(er)en . jn disser stede miner borghen jngheseghelen / t(ru)weliken gheuestened . vn(de) we koneman vn(de) vrederik von heͦym brod(er)e voreghenomed loven / ent(ru)wen vn(de) med sammender hand med vridzen vseme vedd(er)en vn(de) vor ene stede vn(de) gantz tuͦ / haldene also hir voreghescreuen steyd . Dit is gheschin na goddes bord dretteyn hunderd / ihar jn deme seueden vn(de) verthigheste(n) ihare jn der hilghe(n) daghe senthe fabiam vn(de) sebastianes