We frederik sluͦte(re) hannes beẏnigh in der olde(n) stad Conrad von stochusen vnd(e) bernd / vetten in der nẏgen stad to disser tyd boͤrge(re) meste(re) vnde we radman(n)e der ẏnnige vn(de) / der meẏnhet meste(re) beẏder stede Quedlingeburch . bekenne(n) openbare vnde don witlik / alle den de dissen bref seen oͤder hoͤren Dat we von vnser stede wegen . vor achtentich / mark wer silueres de os betaled sin redelke(n) hebbe(n) vorkoft tẏlen muͦllere vruwe(n) / wolburge siner husvruwe(n) vnde sinen rechten . eruen . vnse dre moͤlen der thv liggen / twischen vsen steden . vnde de dredde in vser olden stad . bẏ deme dore also me geyt in vse nẏ=/gen stad vnde dat moͤlen hus . dat dar silues lẏd tegen dat silue dor ouer deme weghe / Vnde hebbe(n) one dat silue gud . vorkoft an buwe an de(m)men vnde an water ghengen . / also dat vse stede hebbe(n) gehath Vnd(e) gheuerd muͦllere vore hadde gehath Vnde we . / vnde alle vse nakomelinge wille(n) vnde scoͤlen se des weren wure one des nod deyt tege(n) / allermalke(n) . Vnde de silue(n) demme vn(de) dat water scal me holde(n) . in der mate also we dat / nv hebb(e)n vorkoft Auer vse stede beholde(n) in dissen silue(n) moͤlen sesse wẏscepele / hardes kornes vnde veyr mark geldes wer silueres . Ewẏgher guͦlde de me alle iar / dar vt geuen scal half vppe sente wolburge dage vn(de) half vppe sente mertens dage / hir en bouen so scolen vse stede alle de guͦlde de dar vore vt vorkoft is geuen vnde / entrichten . vnde we vn(de) vse nakomeli(n)ge scole(n) vn(de) wille(n) disse vorbenoͤmde(n) luͦde aller / ansprake leddegen de oͤne von der vorbenoͤmden moͤlen vnde guͦlde irstuͦnde Ok so / scal me dar von don alle borg(er) recht Dat we vn(de) alle vse nakomeli(n)ge alle disse / vorgesprokene ding scolen vn(de) wille(n) stede vnd(e) ghanz holde(n) des vorbinde we os in / guden truwen Vnd(e) hebb(e)n des to eẏme orkvͦnde dissen bref gegeue(n) besegeled med / vseme openbaren ẏngesegle Vnde is geschin na goddes bort Dretteyn hvndert / Jar des negen vnde veyrtegesten iares Jn deme vrẏdage vor Palmen