Wẏ agnete van der gnade goddes Ebdissche des werliken goddeshuses to Quedelingheburch Bekennen . vnde betughen / openbare in disseme iegenwordigen briue alle den de on seen eder horen lesen . dat wẏ noch alle vnse nako/melinghe nene heren noch nenerleẏe herscop scullen noch en willen teen bouen de stad noch boue(n) / den Rad to Quedelingburch an nenen stucken noch in gheistliker noch in werliker achte . et scheghe / dat we vervnrechtet worden eder de vnsen . et were an tinse an pleghe eder van welker sake dat to/queme dat sculle wẏ vnde de vnsen dwingen met rechte sunder verdechtnisse der stad vnde des / Rades Vortmer bekenne wẏ dat alle vnwille den wẏ hebben ghehat met deme rade de is vruntlik / bericht Ok bekenne wẏ dat wẏ vnde vnse nakomelinghe nen ghesinde heghen noch halden wille(n) . / weder de stad noch weder den Rad to Quedelingheborch des wẏ to rechte nicht vermoghen wene wẏ / auer to rechte vermoghen des recht scal men von om nemen . Vortmer vor hern Hinrike van / hasseuelde vnde . Nicolawese van heẏmborch de de Rad to Quedelingheburch ver louet heft en / wille wẏ nicht bidden . noch vp vnsir borch noch in vnseme behalde weder de stad vp oren scha/den noch halden noch heghen . Dat alle desse vor ghescreue(nen) stuͦcke van vns vnde vnsen nako/melingen stede vnde gantz werden ghehalden . Des hebbe wẏ dissen brif besegelt met / vnseme an hanghenden Jnghesegele . Hir ouer sint ghe west de Edelen heren her Busse de / Juͤnghere van Scrapeleue Ridder Vnder ¹ her wlr(ik) van Querinuorde Vnde her Bernd van / Meẏnerczom Vnde ok mest(er) Jan van Marburch de de domheren sin to Meẏdeborch Vnde her Lẏp/polt van werle de Archidiaken is ouer den ban to Quedeling(heburch) Vnde her Hinr(ik) van Ballenstede / Vnde de Rad to Halb(e)r(stad) Herme(n) orsleue vnde Tẏle scoffel vnde Cuͦrd huͦter Vnde ok de Rad to / asschersle(ue) . albertus vnde hans woldere(n)k vnde ander vele guder lude . Dẏt is ghe schin Na goddes / bort drytteinhundert Jar in deme achten vnde veftighesten Jare Jn sente stephens daghe des . / hẏlghen merteleres alse he ghewuͦden wart