Wie Tyleman wolff ghe hietin schriu(er)e Cone weuel hen(n)igh muͤghge hinze papelan ju(n)ghe / hen(n)i(n)gh warnstede Cord naghel hildebu(n)dis sone hans papelan vnde mestir hans steẏn/degkir buͤrg(ere) tuͦ Quedl(in)ghb(o)r(ch) beken(n)en opintlik in diss(em) brieue vn(de) duͦn witlik alle den die oͤn / sien vn(de) hoͤrin lesin dat wie ghelouet hebbin vn(de) louen alle in guͦdin truͤwin met samdir / hant vor hen(n)ighe van Talheẏm buͤrg(ere) tuͦ asschirsle(uen) vn(de) met oͤme eyne rechte orueyde alse hie / sie gesworin vn(de) ghelouet het tuͦ haldene an allirleyge argelist alse hir na beschreuen steẏt / Jn dissir wise dat hen(n)i(n)gh Talheẏm vm die schicht die an oͤme ghe schin is hie noch neymant / van syner weghin siner fruͤnd edir vromdin dat roghin noch regkin schal an dem rade der / meynheẏt mesterin Jnni(n)ghe meste(re)n an hanse panzfelde an der stad asschirsle(uen) an den boͤrghe(re)n / ghemenlekin vn(de) an orir yslekim by sundirn vn(de) dissin ergenant(en) allin vn(de) by sundirn oͤrerir / Jowelkim nuͤmbir mer arich noch bose tuͦ kerin noch tuͦ fuͤghin schal hie sine fruͤnt hie sine / fruͤnd vroͤmdin noch neymand van siner weghin vn(de) ok oͤren schadin oͤre ergheste der stad tuͦ / asschirsle(uen) vn(de) alle der die sie bewonen nu(m)bir bewetin schal noch wise noch werk met Rade met / dade noch met fulborde dar tuͦ gheuen schal vortmer dat hie die wile hie leuet tuͦ asschirsle(uen) binne(n) / der stad wonen schal vn(de) nicht von dennen thien noch dat sin van dannen bri(n)ghen fuͤrin noch dra/ghin schal hie en do denne dat met des Radis willin witschap vn(de) fulborde wierit ok dat van¹ Talheẏm vorbenoͤmpt edir Jemand van siner weghin disse orveyde alse vorbeschreuen steẏt / an Jen(n)eghin stuͤgken vorbriekin vorruͤcktin edir vor toͤghin des siek hen(n)i(n)gh Talheẏm nicht le/deghin wolde noch en moͤchte met sines suͤlues hant op den hilghin vn(de) wie dar van gemanet / wuͤrdin so schole wie von stadan on dar tuͦ antwerdin vn(de) den broke der stad von stadan fuͤllich / ghenzlich weddir duͦn an allin vortoch vn(de) hindir Des tuͦ orkunde vn(de) merir sekirtheẏt alle disse / stuͤgke vn(de) by sundir ir Jowelk dem Rade tuͦ asschirsleue vn(de) de(n) buͤrg(eren) ghemenlekin dar suͤlues / stede ghantz vn(de) vnuorbrokin ane argelist an allirleyge indracht vn(de) nẏge fruͤndetuͦ haldene / so hebbe wie on gegheue(n) dissin brief witlekin vn(de) met guͦdin willin Met vns(ir) allir ingesegele / na goddis bort dretteynhundirt Jar Jndem vif vn(de) seue(n)tigist(in) Jare in sente lucẏen daghe der / hilghin Ju(n)ghfrouwin