Jk Bechman Sẏuert , vnd Hinrik Brode(re) geheten von hoym vnde vnse Erue(n) Bekenne(n) in dissem / opene(n) brefe dat we ¹ redelken vnd Rechtliken hebb(e)n vorsat vor Eluen brandeb(u)r(gesche) m(a)rk eyn blek holtes / geheten dat czorsik dayl gelegen boue(n) Rolenesburg mit allir nvt vnde to behoringhe Den beschei=/denen luden . hanse staken vnde woldelefe wisinghe Borge(re)n to Quedlingeb(u)r(g) ore(n) eliken husfrowen / vnd oren erue(n) in disser wise alse hir na beschreue(n) steid dat disse ernan(ten) borge(re) vnd ore eruen schulle(n) / disses ornomden blek holtes gebruken vnde beneiten to vorn ses jar v(m)me vnde denne in dem sesten / jare dar na so moghe we edir vnse Eruen dat Blek holtes wedir losen mit elue(n) brandeb(u)r(geschen) m(a)rken dest / we de losinghe den ernan(ten) borge(re)n vnde oren eruen vorkundigen vnd witlik don eẏn verndel jares vor / paschen vnde denne de betalinghe don vnde leisten vppe de sulue(n) paschen in der stad to Quedlingeburgh / mit alsulkeme ghelde elue(n) b(ra)ndeb(u)r(geschen) m(a)rken alse vore beschreue(n) steid were auer dat de losinghe nicht / enschege in dem sesten jare wenne de ses jar v(m)me queme(n) alse disse bref vtwiset so scholden de / vorgen(anten) borge(re) vordan des blek holtes gebruke(n) vnd beneite(n) auer ses jar v(m)me also dat we de losinghe / nicht schullen don sundir in dem sesten jare de wile dat de losinghe nicht en schiit in dem / sesten Jare . so steid de vorsettinghe io vordan ses jar v(m)me er denne dat we dẏt vorgen(ante) blek holtes / wedir losen moghen Des sulue(n) glik moghen disse vorgen(anten) borge(re) edir ore erue(n) ore ghelt wedir / eischen alse vorbeschreue(n) steid vnd willen des ore rechten were wesen wur vnde wanne one / des nod were vnd se dat von vns eischeden vnd willen se dar wol bẏ behalden vnd laten an / argelist , Des to Orkunde so hebbe we ernan(ten) von hoẏm dissen ernan(ten) Borge(re)n vnd ore(n) Eruen / dissen bref dar vp gheue(n) besegilt mit vnsen Jngesegel(e)n vnd Jk hinrik van hoẏm vorgen(ant) / gebruke mẏner Brodere Jngesegele Bechmans vnd Sẏuerd vorgen(ant) an dissem brefe / angehengit Na goddis bort Dritteẏnhundirt Jar in dem vẏf vnd achtentigisten Jare des / neẏsten mandagis na sente vincenci(us) daghe des heiligen h(e)ren