We Borchard van godesgnaden Bẏschop to halberstad Bekennen vor vns vnde al vnse nakomelinge in dussem open breue vnde / vor alle den de one sehen horen oder lesen . So alse den vorsichtigen vnsen leuen besunder(e)n Borgermeister(e)n Radmannen borger(e)n / vnde der gantzen gemeẏne beẏder Stede Quedelingborch van vnsem vorscre(ue)n Bẏschoppe Albrechte gekoren van Brünswigk / vnde dem godeshuse to halberstad vorsegilt vnde vorbreuet is to gebrukene water vnde weẏde eyne halue mile weghes / v(m)me Quedelingborch to ewigen tiden alse dat des gn(an)ten vnses vorfaren breue dar ouer gegeuen utwisen vnde inholden / So hebben we an gesehen oren nod vnde schaden vnde one v(m)me ores deinstes vnde sunderliker gunst vnde gnade willen / de we to one hebben erlouet vnde de macht gegeuen mit witschop vnde vulbort vnses Capittels des dohmes to halberstad / dat se in der gn(an)ten weẏde mogen buwen vnd(e) maken vẏsche dyeke nemliken Jn der sulten to lutken Czallersleue Jn der / hackel wẏsche vnde Jn dem sole vnder dem langenberge Jn den vleden Jegen der kerken to Marsleue(n) So dat se der schullen / vnde mogen gebruken ewichliken an vnse vnser nakomelinge vnses Capittels insage ane geuerde . Vnde we Conrad / deken vnde gantze Capittel des dohmes to halberstad Bekennen in dussem suluen breue dat de opgn(an)te vnse gnedige here mit / vnsem guden willen witschop vnd(e) vulbord den vorgn(an)ten Borg(er)meisteren Radman(n)en borgeren vnde der gantzen gemeẏne beẏder / Stede Quedelingborch dat erlouet vnde sodan(n)e macht gegeuen heft dar ane schullen we noch vnse nakomelinge vnde / willen se nicht hinderen noch hinderen laten to ewigen tiden ane geuerde . Dat alle dusse vor vnd(e) nagescreuene stucke vnd(e) / artikele dusses breues den opgn(an)ten Borg(er)meister(e)n Radman(n)en borger(e)n vnde der gantzen gemeẏne beẏder Stede to Quedelingborch / ewichliken stede gantz vnd(e) vnuorbroken geholden werde So hebben we opgn(an)te Borchard Bẏschop vnse Jngesegil vnde / we Conrad deken vnd(e) Capittel des dohmes to halberstad vnses Capittels grote Jngess(egil) vor vns vnde vnse nakomelinge / laten hengen neddene an dussen breff Na (cristi) gebord vnses leuen heren veirteynhundert Jar dar na in dem drey vnd(e) / veirtigeste(n) Jare Am Sondage alse me(n) singet in der hilligen kerken vocem Jocunditatis