We werner vor dem slinge vnde heẏne protczel to dusser tẏd Alderlude vnde vorstende(re) des goddeshuses sa(nc)ti Blasij to Quede=/lingeborg Bekennen in dussem open breue vor vns vnde vnse nakomelinge vnd(e) vor allesweme de one sehen hore(n) / edder lesen So alse de Ersame(n) henni(n)g vam(me) Rode vnde Hanne sin elike husfruwe vnse parlude , vnsem godeshuse / sancti Blasij dorch orer , orer elder(e)n vnde frunde sele salicheit willen hebben gegeuen vnde vorlaten , ore husz vnde / hoff gelegen bẏ der hogenstrate an der egge Jegen der breden Bode so dat gescreue(n) steit in der stad boẏke , Jnsulker / wise dat se ore leuedage dar Jnne wonen willen vnde dat husz vorschoten vnde alle borg(er)recht dar van don / Sunder we vn(de) vnse nakomelinge schullen dat beteren an dake vnde wur des nod is , vnde na orer beẏder dode edd(er) / eft se dat husz rümeden vnd(e) vt thogeden bẏ orem leuede So schullen we vnde vnse nakomelinge , dar vor don / vnde holden to orem altare den se gebuwet vnd(e) beghiftiget hebben in der sulue(n) kerken sancti Blasij tweÿ lecht / op den sulue(n) altar van twen punt wasses vnde eẏne salmisse kertczen , Jarlikes ok van twen punt wasses / wẏn oblaten vnde fuͮer noͤttorft dar to bestellen vnde schullen ok forder dar to ewichliken alle Jar in der sulue(n) / kerken in der vasten laten singen vnde holden dat Salue regina godde deme almechtige(n) vnde siner werdigen / mutter Marien to loüe vnde dar to bestellen tweẏ lecht van twen punt wasses vnde schulle(n) dem(e) p(er)nere / vnde Cappellan(e) deme kustere vnde scholre dar vor lonen vnde ore(n) willen hebben na redelicheit , wolde(n) au(er) / de p(er)ner to der tijd wan dat geschege vns edder vnse(n) nakomelingen mit dem(e) lone vor dat salue regina to / holden vorhoghen vnd(e) vorsetten edder dat auͮe slan So moge(n) we dat Jarlikes in der vasten to Quede=/lingeborch in ey(n)ner and(er)n kerken bestellen vnde holden laten wur we des bekomen ku(n)nen vnde dat dijt so / van vns vnde vnsen nakomelingen ewichliken stede vast vnd(e) ghantz schal geholden werden ane Jennig(er)=/leige insage argelist vnde geu(er)de So hebbin we des to bekantnisse vnses godeshuses Jngess(egel) vor vns / vnde vnse nakomelinge mit witschop vnde vulbort vnser parlude gemeyne witliken laten henghe(n) / nedden an dussen breff dede gegeuen vnde gescreuen is Na (cristi) gebord vnses leuen heren verteyn/hundert Jar dar na Jn deme seuen vnd(e) vertigesten Jare Am middeweken in den hillige(n) dagen to pasche(n)