Wy Elizabeth von godes gnade(n) Ebdesche Marga/reta prouestinne Ermegard dekeninne vnd / dat ganze Cappittel des werlike(n) godeshus(es) vp / der borch to Quedelingborch Bekenne(n) indusse(m) open breue / alle den de on sehen hore(n) edder lesen dat wy hebbe(n) geredet / vnd gelouet hanse kuzse hanse beningen Borgemestere(n) / vnd deme Rade den mynemestere(n) den Jnningemestere(n) in / vnser Stat to Quedelingburg dat wy se wille(n) schadelosz / halde(n) der vier marck b(ra)ndeborsches siluers de wy mit on / hadden alle Jarlikes vnd de wy nu hebbe(n) endrechttichlike(n) / vor kofft to dre(n) liue(n) vnd rede(n) vnd loue(n) den vorbenomede(n) / wen sie die voresprokene vier marck geue(n) den den wy se / vor kofft hebbe(n) so sint se orer von vns ledich vnd losz we(re) / ok dat sy yma(n)t dar v(m)me anspreke eder to maninge eder / to reden dar v(m)me settede des rede wy vnd loue(n) on ledich / vnd losz to helpene ane allerleyge argelist vnd ane weder/sproke Disser stucke tho bekentnisse vnd orkunde hebbe wy / vorgenomede(n) den ergn(an)te(n) vns(en) borgere(n) to der stad hand / disse(n) open brieff geue(n) mit vnser aller vulbort vnd iowel/kes besunder(e)n besegelt mit vns(en) gude(n) willen mit vns(es) Ca/piteles Jngesegel dat an disse(n) brieff gehenget is Nach godes / gebort duse(n)t Jar drihundert Jar Jndem ander(e)n vnd sestigeste(n) Jare des andern dages na allegodes hiligen dage