WE Borgermeister vnnd Rathmann beider Stede Quedelingborg Bekennen Jn dussem Openn vorsegilden breue vor vns vnse Nakomelinge vor alle(n) / de ohne sehin horen ader lesenn , Dat we eindrechtliken mit gudem(m) Rade vnd wolbedachtem(m) mode van der gnante(n) vnser Stede wegen Ock mit / willen witschop vnnd vulbordt Der Hochwerdigesten(n) Hochgebor(e)nn Jrluchten furstynne frouwen Hedwigen geborn Hertogynn(e) to Sasszen (et cetera) / Des vrien vnd wertliken Stiffts to Quedelingborg Ebdisschynn(e) vnser gnedigen fruwen Recht vnd reddeliken hebben vorkofft vnd vorkope(n) / Jn vnd mit craft dusses breues vp(pe) einen wedderkoͤp van vnsem rathuse ut vnsen vnd vnser Stadt Schoten Renten vnd to gefellen tweÿ / rinssche gulden tinses Der dogetsamen katerine(n) hans doringes seliger nagelaten weddewen vnd dem werdige(n) hern Erordt doringe orem Sone / oren erue(n) ader Hebber dusses breues mit orem guden willen(n) vnd wetten , vnd hebben one de gegeue(n) vor vefftich gude rinsche gulden an gelde , de hans / doringk gotzeliger , Den Ersamen vnsen vorfarnn(e) des Rades Jm(me) viff vnd Seüentigesten jare reide ober wol to dancke vornoiget vnd betalet heft / vnd do suluest jn der gnante(n) vnser Stede nüt vnd fromen angelecht vnd gewant Sin , Dussen gna(n)ten tins twey rinsche gulden schullen vnd wille(n) / we vnd alle vnse nakomelinge Reiken vnd geue(n) bynne(n) der Stadt Quedelingborch den ergedachten katerine(n) hans doringes nagelate(n) weddewe(n) Erorde / orem sone(n) oren erue(n) edder hebber dusses breües mit orem(m) wette(n) vnd guden willen , op den negestkome(nden) Su(n)the Walburge(n) dagh van gift dusses / breües vordt obir ein jar vmbeku(m)mert geistlikes vnd wertlikes gerichtes vnd rechtes , Vnd denne so forder alle Jarlikes op de gn(an)t(en) dage tidt de wile / we edder vnse Nakomelinge den tins twey rinsche gulden nicht wedder aff kopen(n) Ock mogen we edder vnse nakomelinge den tins mit veftigh / Rinsschen gulden wedder aff kopen Jn dussem Jare welkes Jares we willen So forder dat we de losunge des wedder kopes den vorbenomede(n) / eyn ferdel Jares vor der tins tidt de nemlick op winachten toüorn vorkundige(n) vnd witlick doen Des siluigen glick mogen se de Houetsu(m)me vefftig / rinsche gulden op de vorbenomeden tidt ok wedder heisschen wen denne de vorku(n)dinnge des wedder kopes van vns edder one so geschein is So schulle(n) / we edder vnse nakomelinge den vorbenomeden de Houetsu(m)me veftig rinssche gulden , vnd den bedageden tins , vnd oft des tinses wadt vorsethen were / op den Negestkomende Sunthe walburge(n) dagh Jn der Stadt to Quedelingborch vmbeku(m)mert aller gerichte geistlikes vnnd wertlikes gerichtes vnd / rechtes vul vnd alle gutliken wedder geue(n) vnnd betalen an allerleie argelist vnnd geüerde , Vnnd dat alle stucke punckte vnd artikele dusses / breues den mergnanten kopern(n) Stede vaste vnd vnuorbroken(n) schulle(n) geholden werden Des To Orkunde vnd ware Bekantnisse hebben / we opgnante(n) burgermeister vnd Rathmann(e) beider Stede Quedelingborch vor vns vnd alle vnse nakomelinge vnser Stadt Jngesegel / dat grote witliken an dussen breif hengen laten Vnd we Hedwig von goddes gnaden gebornn(e) Hertogynn(e) to Sassen (et cetera) Ebtisschen / des vrien vnd wertliken Stifftes to Quedelingborch Bekenne(n) Jn dussem(m) silue(n) breüe dat sodann(e) vorkopen(n) twen rinssche guld(en) tinsses vnd / alle punckt(e)n vnd artikele vorgescreue(n) mit vnsem(m) wetten willen vnd vulborde recht vnd reddeken geschein sin Des To mehrer / Befestunnge hebbe(n) we vnser Ebdige Jngesegel vor vns vnnd alle vnse nakome(n)de Ebdisschenne(n) des Stifftes Quedelingborch Sampt vnsen / leuen getruwen Borgermeistern Vnd dem Rade gemeyne vnser vorgnante(n) beider Stede Jngesegel witliken vnden an dussen breiff / hengen laten De Gescreuen vnd gegeue(n) is Na goddes gebordt vnses leue(n) hernn veirteinhundert dar na Jnn dem twey vnd / Negentigesten Jarnn am(me) [...]