dat si witlik allen de nv sin vnde nogh tho komende dar na der bort vnses heren mº / cºcº in xcºiij . jare in suͦntte mertins naght brande de stat tho Righe do willekorede de / Raat vnde de menen børghere desse dink tho holdende de hir na be schreuen stat / Tho deme ersten so we buwen wolde de scholde buwen mit stene , vnde dekke mit / stene , were dat also dat de man des night en vor moghe , so magh he stendere setten , / vnde decken mit stene eder mit leme , /

Vortmer so welk vnser børghere , de schot vnde schuͦlde mit vns holt in vnser stat / wil he buwen eẏn orthus . vppe eẏne wort de night an rorende is ghenegher ghestliker / hant , de schal buwen de sit muͦren lanc de straten , vnde schal wesen . viftigh vøte lank / vnde dat paniment schal wesen dikke dre schigh stenes , vnde bouen deme panime(n)de / schal de muͦre hogh wesen ver vnde thwintigh vøte , dar tho schal eme de stat tho / helpe gheuen . tho teẏn vøten eẏn dusent stenes . were ok dat dat¹ de muͦre kortere / were vnde sidere vnde duͦ(n)nere , so schal men eme dar na gheuen , vortmer tho deme / gheuele des orthuses de schulderbret is , deme schal me gheuen . tho ses vøten eẏn / dusent stenes . is he aver anders ghebuwet , so schal men eme dar na gheuen . alse is / he scarp so scal men eme gheuen tho aghte vøten eẏn dusent ² / Vortmer so we vor deme rade seght dat he eẏne muͦren wille legghen , deme schal / helpen sin nabur , vnde scholen se beẏde buwen in deme ppare³ , vnde so welc erer des / night en deẏt . de schal beteren der stat dre mark suͦluers , noghten so schal dat / bwgh vortgank hebben . vnde muͦre schal lank wesen viftigh vøte , were ok dat⁴ / dat se beẏde de muͦren wolden lengher eder kørter hebben , dat schal st(a)n tho / erer beẏder wilkøre , were auer dat al so dat erer eẏn de muͦren lengher wolde / hebben , vnde de andere des night en wolde , so schal me de lenghe , de bouen viftigh / vøte tret , buwen ghe like vppe erer beẏder ertrike vnde ghene de⁵ der bruken wil / de schal ghelden de twe del der kost , vnde de andere dat dørdendel , willet se erer / auer like bruken , so scholen se like betalen , /

Vortmer so we wil buwen ene hus muͦren bi enes anderen hof . de schal me leghghen / vppe erer beẏder ertrike ghe like , so we auer erer bruken wil , de schal betalen de / dre del der kost , vnde de andere dat verdendel . willet se erer ok ghe like bruken / se scholen like be talen . /

Vortmer so we ene hof muͦren legghen wil , deme schal helpen sin nabur , der erer / neẏn bruken wil , de schal me buwen vppe ere ertrike ghe like . de schal hogh wesen . / teẏn vøte . /

Vortmer so we eynen wegh gande heft in sinen hof wil he den vrig be holden / bi sineme hus so schal he bi ene side des weghes legghen eẏne muͦren vnde sin nabur / bi de anderen side malk vppe sine grunt . /

Vortmer so vor buͦt de rat dat neman schal buwen vtlughte an genegherleÿe husen / Vortmer so wor eyn nabur be dinghet eẏne muͦren de schal he buwen vnde dar / tho de brant muͦren /