IN den Jaren na godes bord dusent dre hundert dar na in deme dre vnde tachtentigesten iare vppe / Sunthe mertens dagh So hebben de heren Borgermestere . vnde raͤd to Rige . vns lakenscherers / bynnen Rige beghnadiget mit ener schra . Vnde mit rechticheiden in vnseme ampte toholdende in / desser wise hir na bescreuen . Tho deme irsten . So welk man synes sulues werden wil jn vnseme / ampte . de schal hebben dre mark Riges vngheborget . vnde een paͤr scheren . vnde schal de borger=/schopp wynnen . vnde sin harnasch hebben to sinem lyue . Vortmer so schal he der cumpanie gheue(n) / ene tu(n)nen bires . vnde ene mark wasses to eren lichten tohulpe . Vortmer so schal he een half laken / scheren vppe des werkmesters dische . van enen brugeschen . Vortm(er) so schal he dre lakene volden . / een ypersch . een Thomaͤsch . vnde een Cumesch . Vortm(er) so schal nema[n]¹ t in vnser cumpanie meden / enen knecht eͤr sin mester mit eme gherekent heft to rechter tijd bi vier marken wass(es) to vnsen / lichten tohulpe Vortm(er) welk man enen lerjunghen entfeid . de schal der cumpanie gheue(n) ene tu(n)nen / bires . vnde de junghe schal wesen echt vnde recht gheboren . Ok so schal nemant ene(n) vndutschen / leren jn vnseme ampte bi eneme haluen liuespu(n)d wass(es) to vnsen lichten . Werit ok dat hir een knecht / denen wolde jn vnseme ampte . de schal denen een gantz iaͤr . Vortm(er) so schal vnser een deme andern nicht / to voruanghe wesen in vnseme werke bi eneme halue(n) liuespu(n)d wass(es) to den lichten . Werit ok dat ener / bedderuen vrowen ere man affstorue in vnseme ampte . de mach dat werk holden vp een iaͤr . Js et dat / se sick nicht vorandert binne(n) deme jare na eres man(n)es dode So schal se des werkes entberen Werit ok / dat iemant in vnseme ampte storue . Alse . man . wiff . ofte kind . So schal de gantze Cumpanie to der / bigraft komen . de des nichten deyt de schal betern ene mark wass(es) . Vortmer wanner de cumpanie / to samene drinket . vnde de irste beker vpkompt So schal dar nemant² clagen bi dren marken / wass(es) to vnsen lichten eͤr der rechten steuen tijd . Vortmer wan de cumpanie to samene gheid . vnde / de werkmester sitten gheid . So schal een Jewelk man sin stekemest aflecghen . werit dat he des / nichten dede . vnde de werkmester dat mest eschede . So schal he id deme werkmestere doͤn . vnde / nicht weigheren . Also vake alse he deme mestere dat mest weigherde to donde . So schal he betern / ene mark wass(es) to den lichten , Vortmer welk man in vnseme werke sines sulues werdet lest . de / schal der cumpanie to segghen . wente to der tijd dat een ander sines sulues werdet in vnseme / ampte . Bouen alle desse artikele . vnde vorscreuene stucken So schal vnde wil de raͤd tho Righe / de ouersten hand hebben /