Witlike si , dat wi Borgermeistere vnde Raed der stad Rige / deme erliken manne her Lubberte wittenborghe vnsis rades / cumpane vnde sinen erfnamen ghedan hebben een Ruem / bẏnnen vnsis stades veltmarke ouer der duͦne benedden des / hillegengeestes ackere in der wiltnisse ligghende bẏnnen / dem Sijpgrauen , de dar gheit van deme heidberghe dael / ter Pele wart , vnde den Grauen vort beneffen der Pelen / wente an her arnd plaggals hoẏslagh , vnde aldus den / grauen tenden her arnd plaggals hoyslaghe wedder vp/wart wente an de heidberghe vnde in den voet der heid=/berghe wedder toghande in dat ambegin des Sijpgrauen / uorgescreuen dar de wech to Bullen wart bouen hengeit / Dit sulue Ruem bynnen den uorgescr(euenen) Grauen vnde terminen / ligghende hebben wi her Lubberte wittenborghe vnde sinen / erfnamen ghedaen to Rumente vnde to ewighen tiden in borger/rechte tobesittende vnde tobrukende vnde io gants tosamen / vnghedeylet toblyuende Jodoch also dat de uorschreuen her / Lubbert vnde sine erfnamen vnde alle de ghenne den it / vort an gheeruet edder uorkoft mach werden scholen tho / ewighen tiden vnser Stad Righe alle iaer den thegeden ofte / den Teynden gheuen van alle deme dat bẏnnen deme uorscr(euen) / Rume des iares ghewunnen werdet Gescreuen in den iaren / na godes ghebord dusent drehundert dar na in deme / dre vnde Negentigestem iare in Sunthe Andreas auende /