Jt(em) de andere breff lud aldus /

Vor allen luden de dessen breff sen hoͤren edder lesen Jk woldemer van rosen heren Johannes soͤne / van rosen enes ridders [...]man der hilgen kerken tho Rige bekenne openbare dat myn vedder her woldemer / van rosen ridder heren Otten soͤne van rosen enes ridders deme god gnedich sy vn(de) jk genomen / entfangen vn(de) vpgeboͤret hebben van deme Erbaren Rade vnde van der Stad Rige anderhalffhundert / mark rig(esch) de jn vnse vnde vnser erffnamen nuͦt gekomen vnde vͤtgelecht sin dar wij deme rade / vnde daͤr vorgescr(euenen) stad Rige voͤrg(e)sat vnde gelaten hebben vor en pant vnse eruͦe vn(de) vnsen hoff / dehoff van rosen geheten bẏnnen der vorbenoͤmeden Stad liggende also de opene breff den wij vnde vnse / eruͦen deme Rade der Stad Rige dar vp gegeue(n) vn(de) bezegelt hebben inholt vnde clarliker wol uͤtwiset des / so hefft de erbenoͤmede erbare Raet vn(de) Stad my woldemer van rosen vnde mynen rechten rechten eruen / v(m)me sunderlik begere vn(de) esschinge willen noch vefftich mark rig(esch) gedan vp vnse erue vnde de hoff / van rosen voͤrgescr(euen) jn alsodaner wise mate vnde bewaringe dar vp tho bliuende vn(de) tho stande also de erste / opene breff den her woldemer mẏn vedder vn(de) jk woldemer van rosen vor vns vnde vnse eruen dar vp gegeue(n) / vn(de) deme vorgescr(euen) Rade vorszegelt hebben jnalle sinen artikelen gantsz inholdet [vnde] clarlikes utwis(et) vnde / denne wedder qwyten vnde van deme Rade vnde der Stad loszeden , vnde wij dar na v(m)me jenegher sak [...] / vns anliggende dat voͤrgescr(euene) vnse¹ erue vnde den hoff jemende vorsetten vorkopen edder vorpanden scholden / edder wolden So loue jk woldemer vor myne rechte eruͦen jnguden truwen vnde suͤnder argelist enen openen / beszegelden breff deme Rade vnde der Stad tho Rige tho wuller vnde tho gantszer genoͤge tho geuende er men / dessen jegenwerdigen breff vnde vnsen ersten breff hir vp gegeuen breket vnde dodet dat jk woldemer vnde / myne Rechte eruͦen dat voͤrgescreuen vnde den hoff van rosen anders nymande den deme Rade vn(de) der voͤrgesc(reuenen) / Stad vorsetten vorkopen noch vorpanden schoͤlen vnde² willen effte enem boͤrger jn erem boͤrger rechte tho / bliuende dar deme Rade vnde der Stad nenerleẏe vorvank edder wedderwille van scheen moge vp dat dessevorges(creuen) / dink gantsz war vaste vn(de) Sunder weddersprake alles rechtes also gestlik vn(de) wertlik vnthobroken geholden / werden So hebbe jk woldemer van rosen [..] der hilgen kerke tho³ Rige mẏn Jngeszegel vor my vnde / myne rechte eruͦen Tho orkuͤnde mẏt willen vnde gantszer witschop an dessen breff gehangen gescreue(n) / vn(de) geue(n) Jndeme Jare nagodes bort m ccc Jndeme xcvjten iare des achteden dag(es) na passchen