Vnsen vruntliken grot tho voren g(...) witlike sy iwer Erzamket leuen vruͤnde dat / vns vnse Erzame mester ghescreuen heft dat muncighert dy heftman van ploscowe / iv vnde em enen bref ghescreuen heft dar ine hee klaget ouer vns dat wy / sinen luden vele vordrites doͤn dar med wy den kop vrede ghebroken heben . des wet(et) / leuen vruͤnde dat wẏ in med alle nicht ghedan heben bouen recht . des nuͦ tho somer / en iar was do neme wẏ em . v . pert als en olde ghewanhet is dat se nen pert / up riden muͤten dy sy hir neden kopen sunder bewisinge alz iv suluen wol witlike / is . do wy in dy pert nomen da nemen sy vns ij laste soltes weder tho ploscowe . des / sanden wẏ vnse boden to enem mal to dem anderen mal to dem derden mal to dem verde(n) / mal an den namesnike vnde an dy ghemenen ploscoͮwer vnde leten sy bidden dat se / wol deden vnde dat se vns vnse solt weder gheuen . wert sake dat se menden dat wy / in ere pert tho vnrechte ghenomen hadden dat se an vnsen erzamen mester screuen / hete hee [se]¹ vns weder gheuen wy woldent gheren don Sy seden sy enwolden nicht an den / mester scriuen do seden wy wer id sake dat se id nicht don woldeͤn vnde ok nicht bẏ / rechte laten wy wolden vns holden an se edder an er ghuͤt war wis af langhen konden / alzo lange dat vns ghelike vor vngelik ghesche [vnde dar med den vrede nicht ghebrochen heben]² des nem wy en to hernesce en strusen med / vij seke soltes vnde nu j laste anders hebe wẏ en nicht med alle ghedan . vnde menen ok wol / dat wẏ den vrede hiͤr med nicht ghebroken heben . sẏnt wit alze vaken vorvolgeden . vnd ok / ghelike noch recht nicht helpen mochte . ok woͤlle wẏ vns desser sake wol voranwor=/den eft med in tho worden komet Sc(reuen) tho duneborgh des dinghesdages vor lichtmes / Kumpduͤr / tho duneborgh /