Vnsen willighen deẏnst tho vore(n)scr(euen) . wettet hern vnde leyue(n) vrende . dat wij wern / tor Asmu(n)de mit mynnegeile(n) . vnde eten . do quam h(er)man badinc dar tho vns van vitoute(n) / vn(de) brachte eyne(n) brieff hijr bẏnne(n) besloten . den breke wij vp vn(de) lesen ene . hedde / vns die brieff . bẏ der duͦne worden . wij hedden wedder v(m)me gecart , do voͤre wij / vort drie mile weghes tho . Crauwe vn(de) neme(n) h(er)ma(n)ne Badinghe mede . dar vu(n)de wij / den koni(n)c . vn(de) worue(n) vnse werff . alze hij vns beuolen hebben . do hoͤrde vns die / koni(n)c guͤtlikene . vnde gaff vns tho antw(or)de . dat he wolde tho Smolle(n)seke w(e)c . vnde / wolde drie weken in der vasten . tho ploskau wesen . do bede wij ene dat hie wol / dede . vn(de) vorbodede die ploskauwer in den wech war it eme beuellichest were . he / antw(or)de die tijd we(re) to cort . he wolde vns gerne twe Boiare(n) mede geue(n) . alze hern / Brachusen vn(de) ene(n) ande(re)n . die soelde(n) syne macht hebbe(n) . vn(de) soelde(n) die ploskauwer / berichten . dat sie den Copman leten . by syme alden r(e)chte . alze die breyue vth / wijsen . do dankede wij eme . vnde segeden . wij wolde(n)t mit en vorsoͤken . mochte / vns dar Redelicheit wedder varen dat wolde wij g(er)ne neme(n) . wert dat des nicht / ene gesche . so wolde wij synre herlicheit beiden . dat behagede eme wol , vort / spreke wij v(m)me die vart tho Smolle(n)seke vn(de) v(m)me des Copma(n)s vriheit . do segede / he dat wij mede voͤren tho Smolle(n)seke . hie wolde vns behelplich sin tho allen sake(n) / die vnse brieue ynne halden . wij antw(or)den . wo wij vns . dar nicht tho vth geret / en hedden . vn(de) beden ene . dat hie . de Smolle(n)seker mede tho ploskau brechte . vn(de) / se er brieue(n) mede neme(n) . he segede it solde geschein . hijr v(m)me . leyue(n) vrende . doet / wol vn(de) scriuet vns iwe(n) wille(n) . alz van den Smolle(n)sche(n) brieue(n) . wante dar steet / ẏnne alze hij wol weten . dat die Russen moͤghe(n) . segele(n) . van Gotlande in die / Trauene . vnd dar stoͤte wij vns sere an . hijr v(m)me latet den brieff ou(er) lesen va(n) / Smolle(n)seke . wa(n)te die brieue . de wij hijr hebben . de hebbe wij hijr ouer lese(n) laten / dar stae(n)t ynne . die van der Rige . van Gotlande . van lubeke . vn(de) ok ander stede / in westfalen . vort doet wol . vn(de) seyndet vns . veir verde(n)del soetes wins . vnd / vj par guder swart(er) hoͤsen . vn(de) iiij poͤtte . Engeuͦars . xij par sporen . iii droghe / laesse . vn(de) . x . pu(n)t mandelen . vn(de) . x . storuische . vortm(er) hefft vns h(er)ma(n) Badinc / berichtet wo dat die Borghe(re) tho ploskau vntfange(n) hebben den nẏen pu(n)der / vn(de) dat Coelsche pu(n)t is aff . Anders nicht dan doͤt wol vn(de) scriuet vns en antw(or)de / diess(es) brieffs alz hij alre eirsten ku(n)nen . vart wol in God . Gescreue(n) tho Creuwe / des vridaghes . vor vnser vrauwe(n) lechtmisse /