Vnse ynneghe bet myt alle des guden des wi vormoghen an god to voren Leuen zunderghen vrundes . wi dun / juwer leue witlik wo dat juwe bur van deme hilghenghestes haghen werden vorwaldet vnde vor vn/rechtet an ener schede dat wi zwarliken liden van erer weghene vnde is vns gansliken led . des zeghe / wi gherne dat gi van den juwen hir enen edder twe zanden ouer to vns den wolde(n) wẏ myt truͦwen / bẏ staͤn . vnde wolden en aller stuͤcke vnde zake berichten vnde wolden en helpen [dat]¹ des besten des wẏ / mochten vppe dat de armen lude ende kreghen dat ze bẏ rechte mochten blẏuen wente wẏ vnde ze dar / zwarliken ane zitten vortmer zo zeghe wẏ gherne dat gi vns gheuen vnd zanden ene vtschrift / des haghens vnde des gudes alze juwe breue luden dat wẏ wisten wor vp dat wy vns zetten mochten / wente vns alle dyngh vmbekant is wor vp dat wẏ deghedinghen mochten hir v(m)me zo is des behuf / vnde nod dat gi wene to vns zenden de vns helpen vnde wẏ en dat de armen bur der bezwarynghe los / werden . ok zo kone wyͤ juw van dessen zaken alzo vele nicht to schryuen alze des wol nod vnde behuf / were . des wy desseme jeghenwardighen breff wyser deme erliken ma(n)ne gherddema(n)ne gansliken aller / zake berichtet hebben vnde witlik ghe dan de schal juw anrichtinghe gheuen alles dinghes . vnde wes / he juw zecht des schole gi em alzo vaste louen alze oft wẏ juw dat zuluen nu(n)dliken zeden edder / to schreuen . vnde wes juwe wille hir a(n)ne ys des bidde wẏ juwe gudlike antwarde bẏ deme ersten boden / de juw stedet . De allemechteghe god de beware juwe lif vnde juwe zele Schreuen to Doberan des dinghes/daghes vor palmen vnder vnsem jnghezeghel / Frator Herma(n)nus abbas Mon(asterii) denot[...] / doberan [...] in omn(i)b(us) fidelis (et)