Wy Borgermeistere vnd Radma(n)e der Stad Rige bekennen vnd betugen openbar in vnd mit dessem / breue dat an vnse Jegenwordicheit gekomen Js hans Blumer vnsir Stad medeburger openbarlike(n) / bekennende vnd seggende dat he vnd sine eruen recht vnd redeliken vorkofft hebbe(n) dem ersame(n) / herborde Seeldenbot vnd sinen eruen Seesz fferdinge Rigesch nies geldes Jarliker Renthe vor / vyffvndtwyntich mark Rig(esch) dessyluen nien pagime(n)t(es) als genge vnd geue Js in dage Jare gyffte / desses breues der eyn Jslik vorg(enante) getalde mark an sijk hefft vnd hebben sal Seuen lot lodiges syl-/uers Jn vnd vp sin husz belegen in der Rijken Strate bouen vpdem orde negest her gerwin gendenae / huse ,, de renthe vorg(enant) edder de werde dar van alle Jar vt torichtende vnd tobetalende updat fest pasche(n) / sunder Jenigerleye vortogh ,, Behalden dagh hans Blumer vnd sine(n) erue(n) edder den rechten besitters / des vorg(enanten) huses intokomden tiden vullemacht vnd moge de vorg(escreuene) Renthe vor den vorbenomeden / houetsu(m)men edder de werde dar van updat vorg(enante) ffest pasche(n) wedderafftokopende wanner en dat / behaget vnd al der best vellich Js su(n)der Jemandes weddersprekent ,, desser dinge in eyne ware tuch-/nisse Js vnser Stad Jngesegel vndir An dessen breeff gehangen de geue(n) vnd gescreue(n) Js an (cristi) / vnses here(n) gebort dusent verhu(n)dert indem xliiiten Jare upden midweeken in der verden weeken na / Paschen