Wy Siluester von godes vnd des Romisschen stoles gnaden der Hilligen kerken to Rige Ertczbisschopp , don kund vnd openbar allen / de dessen vnsen breeff sehen horen effte lesen So alsdenne yn vortiden vnsir kerken prouest deken vnd Capittel vor datt(um) desses breues / wedder vnse leuen getruwen voged Borgermeistere Raed vnd(e) meynheit vnsir Stad Rige Im hoeffe [t]o Rome etczwelke gudere als / mit namen dat landt Titier teghen dolen vnd dem stenholme ouer der dune belegen vnd etczwelke andere gudere buten efft / bynnen der Stad Rige wo de syn ym rechte affgewonnen hebben Also dat en mit dren Ordeln so[ld]e¹ gudere togespraken syn ge/wurden v(m)me meringe groter leue tusschen den itczundigen Prouest deken vnd Capittel vnd den benomeden vogede Borger=/meistere Radmannen vnd Menheit vnsir Stad Rige , hebben de ergedachten Prouest Deken vn[d] Capittel yn vnses Ertczbis=/schopps erbenomet Jegenwordicheit angesehen der Stad rechticheit mit vryem willen ouerantworden alsulke gudere alle so vor/benomet stat de ze en deel yn weren hadden , den vorberurden vogede Borgermeisteren Radmannen vnd Menheit yngeantwordet / vnd yn krafft desses breues ouerantworden , vorsakende ouergeuende vnd delghende alle vorberurde Ordel vnd process efft / schriffte de vor datt(um) desses breues dar ouer Jm hoeffe to Rome beholden vnd gewonnen syn Ok de breue de to kerckholm vor=/segelt syn mit erer ynholdinge gudere vnd ordel effte schriffte Alle dusse vorgeschreuen artikel vnd puncte vnd eynen Isliken / besunder(e)n Wÿ Siluester Ertczbisschopp vnd Theodericus nagell prouest Johannes Treppe , deken vnd dat gantcze Capittel / to Rige vorheten vnd gelouen yn crafft dusses breffes , dat wy efft vnse nakomelinge to ewigen daghen mit sodanen Ordeln / vnd process effte breuen de vorgedachten voged Borgermeister Raed vnd Menheit ny(m)mer sollen effte willen anclagen sunder / ze by sodanen gudern rowliken bliuen laten to ewigen tiden , Des to merer Tuchnisse hebbe wy Siluester der hilligen kerk(e)n / to Rige Ertczbisschopp vnd Theodericus nagel Prouest Johannes Treppe deken vnd dat gantcze Capittel der hilligen kerken to / Rige vorbenomet vnd wy vere van der manschopp dersuluigen hillig(e)n kerken alse her Jurigen pereuall vnd her Jurig(e)n Ixail (?) Ritter(e) / Engelbrecht van Tisenhusen vnd Merten van vnger(e)n vnse Jngesegil geheten hangen vnden an desen breeff , De gegeuen vnd / geschreuen is to Rige am Sondage Judica ÿn der vasten Jm iare (cristi) dusent veirhundert veirvndvifftich /