Wẏ Borghermeistere vnde Raedmann(e) der Stadt Rẏghe bekennen vor / alle(n) de dussen Breff zehen , horen , edder lesen , vor vns vnde vnse nakomeli(n)ge / jnn(e) vnde mit dussem(e) Breue , opembar bethuͦgende , dat wẏ recht vnd(e) redelik(e)n / vorkofft hebben , dem(e) erliken prestere her peter Scharn ewigen vicario jn(ne) / der hilgen kercken to Rijghe vẏff olde marck Rijghes iarliker Renthe vor / hundert m(a)r(k) Riges . dessuluig(e)n olden pagiment(es) alse nuw in giffte dusses Breues / jnn(e) lyfflande genge vnde geue sin de wẏ to vullernoghe an(ne) redem ouerge=/taldem(e) gelde deger all entfangen vnde upp(e) geboret hebben van her(re) peter scharn / vorgedacht vnde vortan(ne) in vnser Stadt redelike vnde bederflike nuͦth gekart / vnde an(ne) gelecht hebben de Renthe vorschre(ue)n effte de weerde dar van alle iar / uth to richtende vnde to betalende upp(e) dat ffest paschen tho nuͦtte vnde vor=/beteringhe der vicarien des altares Sunte Barbaren jm(e) dome to Righe de wan=/daghes zeligher peter van Sunneren gestẏfftet vnde gemaket hefft Behol=/den doch vns vnde vnsen nakomelingen in tokomenden tyden gantcze vrye / vuͦllemacht de vorschre(ue)n viff m(a)r(k) iarliker renthe vor den vorbenomeden / houetsu(m)men wedder afftokopende vnde to losende wanner vns dat vnde vnsen / nakomelingen allerbest vellich is vnde wol beqweme sunder ẏmandes wedder-/sprekent des tor tuchnisse vnde orkunde der warheit is vnser Stadt Jngesegel / gehangen witliken benedden an(ne) dussen Breff , de geuen is vnde geschre(ue)n Jnn(e) / den Jaren na der gebort Cristi vnses heren veerteinhundert vnde Jm(me) sesz/vndeseuentigesten jare am(me) donnerdage negest na dem(e) Sondaghe lletare Jerusalem /