Ick Johan(n) Asschenbrock Bekenne apenbar vor allen de dussen myne(n) opene(n) vorsegelden breff zeen horen edder leszen / vor my vnde myne rechten erue betugende dat alsze ick my denn(e) den Erszamen wolwisen he(re)n Borgher meyste(re)n vnd(e) / Radtma(n)nen der Stadt Rige in lifflande vnde erer stadt ghemenheyde vn(de) Jnwoneren allen vor ene(n) houetman(n) to ere(n) / besten bestedighet ze my dar vor na vnszer endracht vnde ouereynkome(n)ghe dar to vp ghenome(n) vn(de) dar uor gheholden / hebbe ere gunste leue vnde gude ffru(n)tschopp bewyset vnde my Jarlikes to lone ghelonet deger all Entliken(n) vth gherichtet / vnde wol betalt hebben des ick Johan(n) Assche(n)brock den Erszame(n) borg(er)meysteren Radtma(n)ne(n) vn(de) der Stadt Rige gudt / ffruͦntliker betalinghe leffliken bedancke So hebbe ick vorlaten vn(de) qwidt gheschulden vorlate ock vn(de) qwidt / schelde de erghenante(n) borg(er)meystere Radtma(n)nen Jnwonere(n) der Stadt Rige vry qwuidt ledich vn(de) losz in vnde myt crafft / dusses breues jntokome(n)den tijden vp de ergena(n)ten Borghermeystere Radtma(n)ne jnwonere noch vp de Stadt Rige / vor my vn(de) alle myne rechten erue in nenerleye wise noch myt rechte geystlick edder wertlick noch sust anders in nener / mathe bute(n) off by(n)nen landen mynes denstes halue(n) offte ghelouedes ghedencke edder wyl se vorder mane(n) anlangen to / spreken moyen by eren truwen vnde cristliken gheleue(n) ane alle argelist vn(de) geuerde des tor tuchnisse vn(de) orkunde der / warheyt hebbe ick Johan(n) Asschebrock merghedacht my(n) angheborne(n) Jnghesegel vor my vnde myne rechten erue / witliken benedden an dussen breff anghehangen de geue(n) ys vn(de) screuen des ma(n)dages vor pinxsten / Ann(o) dom(ini) lxxxixt(en) Ja(r)e /