Vnsen vylgen Denst Nü vnde tho allen tyden Ersame leyue her johan schoni(n)ck vnd Her Eüert steüen alse yn Ersam(m)heyt / vns seden dat gy oüer en komen weren myt dem erwerdighen meyster alse van dem holte vnd van der assche aff tho / komende myt vnseme güde dat wy dem Erwerdighen meyster scholden geüen ij laken dat wy vnse güt mochten aff brenghen / so boleyüede wy dat sodan gelt vt tho rychtende alse vor dey laken alse yw Erbarheyt vns tho en boͤt by her nicola(wes) holsten / dat dey Erwerdyghe meyster jw tho schreyff dat hey en laken hadde gekoet vnd wy solden sodaen gelt reyde maken / vp passchen dat me dey laken mede botalen so sede wy her nicola(wes) holsten dat wy so daen gelt vt richten wolden vp dat heft / vns got en güt water gegeuen dat wẏ vnse holt hebben aff gebracht So en wyl vns dey kümpthor nicht holt edder assche / aff steden hey en sey des meysters breyff . so heft vns dey kümpthor g(ena)nt dat wy dat holt by dat wer gebracht hebben / vnde hebben en(c) ma(n) vnd lxxx lẏggende dey alle dage koct vnde loen hebben wyllen wy en kon(n)en er nicht langhe holden / wy en hebben neyne fetallighe mer vnde salt langhe düren so geyt dey strom en wech so blüue wy lyggende myt dem holte / So ys vnse vrontlike bede dat jw Erbareyt so wol wolden doen vnde senden an den Erwerdighen meẏster dat gy synen / breyff kreghen dat wy vnse holt vnd assche aff kryghen dyt iar wante dey kümpthor en wyl vns nicht aff laten hey / en hebbe des meysters breyff So ys vnse wrontlike bede dat wy yo en antworde mochten kryghen by dusseme ma(n)ne / edder war jw best by düchte Nicht mer wen got spar jw langhe gesu(n)t tho syme deynste Ges(creuen) in jar lxxxxiij des fry=/dages vor vnser leyuen frowen gebort /

Alle dey koepman vp der müs /