Wẏ zegheband . vnde Johan Bruder gheheten van wẏttorp knapen / bekennen vn(de) betughen openbare In dessem breue dat wẏ mẏt / ghanser wulbort otten van wẏttorp(e) vses bruders . hebben verla/ten vn(de) verlaten In dessem ẏeghenwerdeghen breue . alle dat . dat / wẏ hebben ghehad wente an desse tẏd . an tẏnze . an ghulde . an / voghedẏe . an Rẏchte . vn(de) wurane wẏ dat ghehad hebben . In dem / Dorpe thu lutteken nẏendorpe dat lẏd bẏ dem huse tu wertbeke¹ / thu sunte Joh(ann)is altare de vnsen heren dofte . dat lẏd thu soltwed(el) / In vser vrowen kerke . vn(de) thu des p(re)sters hand vn(de) nuͦt . de thu / deme altare beleened is van den ghẏldemestern der wantsnẏder thu / soltwedel . vn(de) thu des hand vn(de) nuͦt de hir na van en mach beleened / werden thu dem suluen altare . alzo dat wẏ In dem vorbenumeden / dorp(e) . Noch In velde des suluen dorpes Degher nẏcht beholden . , / Dar vor sẏn vs ghegheuen vn(de) betaled . twe vn(de) twẏntẏch mark / luneborgher pe(n)ni(n)ghe . de wẏ In vse nuͦt ghekered hebben . De / tughe desser dẏnk sẏn de acbare(n) lude . her otte van Dannenb(er)ghe / vse om . vn(de) clawes ghodscalk borgher thu soltwed(el) . vn(de) vele ander / bederuer lude Thu ener grotter betughẏnghe desser dẏnk . heb/be wẏ vse Inghezeghele laten henghen an dessen brẏf . mẏt vser wẏs/schop . ok bekenne ẏk otte van wẏttorp(e) knape . dat ẏk dorch bede / wẏlle mẏner vorbenumeden bruder . mẏn Inghezeghel hebbe hen/ghen laten an dessen brẏf . thu ener wullenkomener betughenisze / desser vorbescreuenen dẏnk . Gegheuen na godes bord drẏtteẏnhu(n)/derd Jar . dar na In dem neghen vn(de) vẏftẏghesten Jare . des mẏd/wekes vor sunte thomas daghe des hilghen apostels /