In nomine d(omi)ni amen Wẏtlik sẏ . dat ik godeke her hermens bescheẏde vnde gheue . alheẏd vnde elẏzabet . mẏner docht(er) kẏndere . mẏn hus dar ik / Inne wone vnde den hof mẏt deme spẏkere . vor deme Sẏgheldore . also dane wẏs . wan sẏ to eren Jaren kome(n) So scal me eme dat ghut antwerde(n) . Dẏt / be vele ik mẏneme brode(re) her hinrico perrer to Osterborch . vnde mẏner suͦste(r) alheẏd vnde thẏdeken her hermens mẏneme brode(r) . vnde heẏne wẏstede(n) / vor tostande also ik eme to loͮue . wer dat desser welk af ghẏnge van dessen vyren vorbenuͦmeden . So scolen dẏ ande(re)n eẏnen wedder kẏsen in dẏ stede . dẏ de / kẏnde(r) vorstan helpe . wante dat sẏ to eren iaren kome(n) vnde beraden werden nach deme rade mẏner vruͦnt . vortmer wer dat desse kẏndere stoͮruen . / er sy to eren iaren quemen . So scolde(n) . desse vẏre benuͦmeden her hinr(ik) . alheẏd . thideke her hermens vnde heẏno wẏstede . dẏt vorbenuͦmede ghut / legghen an eẏn altar . edder an ander almẏssen Vortm(er) bescheẏde ik vn(de) gheue alheẏd mẏner docht(er) to kreueze vnde alheẏd thideken her hermens / docht(er) vnde alheẏd he(n)neke(n) wendes docht(er) to kreueze mẏn hus vppe der drẏue dẏ wẏle dat se leuen wan se sterue(n) . so scal it valle(n) an mẏne rechten eruen . / vortm(er) gheue ik alheẏd mẏner docht(er) den cram dar Inne wonet ludeke horwelker dewẏle dat se leuet . wan se steruet so scal it valle(n) an mẏne rechte(n) eruen . / vortmer gheue ik thẏdeke(n) mẏneme brode(r) vn(de) alheẏd mẏner suͦste(r) eẏne wẏsch bẏ der gẏszene . vnde suͦnderlike(n) gheue ik thẏdeken dẏ orẏnghewẏsch vnde / gheue thẏdeke(n) . x . puͦnt van den schuͦlden . dẏ mẏk de van der schulenborch sint . Vortm(er) gheue ik heẏneke(n) he(n)neken wendes sone xxiiiij mark pe(n)ninge vnde / mẏne want kẏste . Vortm(er) hebbe ik in deme stouen vor der borch . twe mark pe(n)ninge alle jarlik to tẏnse vnde eẏne mark pe(n)ninge In hans teghelers hokenboden . / de bescheẏde ik to ener spende der apostole . also dane wẏs , eẏne mark pe(n)ninge scal me gheue(n) vor dechtnisse , mẏner Sele . vnde mẏner vruͦnde Sele alle jarlik / Vortm(er) gheue ik todeme buwe vnser vrouwen twe mark suͦluers . Vortm(er) Suͦnte laurentio eẏne halue mark suluers . Den brode(re)n eẏne mark suͦluers . ẏslekeme / brode(re) ij schillinge vor missen . To suͦnte kath(er)inen eẏne halue mark suluers ẏslekeme he(r)n ij schillinge vor mẏssen To suͦnte nẏcolawese eẏne halue mark / suluers To deme hilghengheste eẏne halue mark suluers . ẏslekeme he(r)n ij schillinge vor mẏssen Den sẏcken eẏn tun(n)e bẏrs dar suͦlues suͦnte georgio eẏne(n) / verding . deme perrer ij schillinge vor mẏssen . Den Sẏcken eẏn tuͦnne bẏrs . Vortm(er) dren Cappellanen To vnser vrouwen . ẏslekeme iiij schillinge vnde ẏslekeme / vica(r)ie(n) ij schillinge vor mẏssen . Vortm(er) To kreueze eẏn half vuͦder bẏrs . vnde ẏsleker vrouwen eẏne semele . Toder arnsze eẏn half vuͦder bẏrs . vnde ẏsleker / vrouwen eẏne semele . To dambeke eẏn half vuͦder bẏrs . vnde ẏsleker vrouwen eẏne semele To dẏstorpe eẏn drẏling byrs vnde ẏsleker vrouwen eẏne semele . / To ẏse(n)haghen eẏn half vuͦder bẏrs vnde ẏsleker vrouwen eẏne semele . Vortmer gheue ik alheẏd vnde elẏzab(et) mẏner docht(er) kẏndere al mẏn Inghedoͮme / ketele . gropen . bedden . de panne vnde also ik it In mẏneme huse hebbe . To vormuͦndere al mẏnes ghudes kẏse ik he(r)n hinr(ik) mẏnen brode(r) . alheẏd . / mẏne suͦste(r) . thẏdeken . her hermens mẏnen brode(r) . vnde heẏno wẏsteden . wor ik it hebbe . vppe deme Rathuse . xx . mark suͦluers . Vnde de Schuͦlde / dẏ ik hebbe mẏt den vrouwen van der arnsze vnde vortmer wor ik it hebbe . an schult vnde an¹ redeme ghude . dẏt testament(e)n scal stan dewẏle dat ik / godeke her hermens dessen brif nẏcht wedder en esche Sunder Jengherleẏge ansprake van deme rade . p(raese)ntes . sunt . p(ro)consules thider(ik) thuͦritze / (et) Johannes wẏtte . voltze hartwici . thideke her hermens vnde Johannes kalene vnde alheydis mẏne suͦstere . anno d(o)mini mo ccco lxo / sabb(at)o ante dominicam qua cantatur Esto michi /