Wẏ arnt van der bẏsa Coppe b(ru)now . vritze van Krichelendorp . Thid(erik) hilden(e) . Heẏne speni(n)g , Albrecht b(re)vicze .He(n)nek(e) rekeling . Ermbrecht / He(n)eke callene vnd Heẏ tilbe . Ratmanne der nẏenstad tho Soltw(edel) Bekennen vnd(e) bethughen openbare In desme briue dat wie mẏt rade / vnd(e) vvlbort vser eldesten vnd(e) vͧs(er) wisesten . sint endrechtich gheworden . mẏt den wẏsen luͮden den ratmannen der oldenstad tuͮ Soltwed(el) . / Eẏnen berchfrede tuͦ buͦwende vnd(e) tuͦ settende . vor den vort tuͦ Luͮbbow(e) . vnd(e) wat , diͤ Barchfrede kost(e) to buͦwende tuͦ settende tuͦ bete/rende vnd(e) tuͦ holdende . dat scole wẏ vnd(e) willen half vt legken vnd bekosteghen vnd di ander helfte scolen sie dyͤ Ratma(n)ne der / oldenstad to soltw(edel) vo(r)ebenom(et) vtlegken vnd betalen . wer(et) ok dat die ẏenne die den berchfrede bvͦareden . van vser weghen . vnd van erer / weghene en ẏnne hedden . scaden dar van edder dar vppe nemen . des got nicht enwille . den scaden scolde wie half legheren . vnd(e) die ratma(n)ne / der vo(r)ebenomeden olden stad tuͦ soltw(edel) . scolden die anderen helfte des scaden legheren . Nemen sie ok vromen . die jenne die dessen berchfrede / Inne hedden . des vromen helfte scolde wie . vnd(e) sie die ande(r)n helfte . vp boren . vortmer tuͦ den kosten dessen berchfrede toͮ holdende . scalme neme(n) / pe(n)ni(n)ghe van dem vee . vnd(e) queke vnser borghe(r) beẏder stede tuͦ soltw(edel) . alzo hir na bescreuen steẏt . alzo van jewelker koͮ vir pe(n)ni(n)ghe se w(er)de sunder/liken hodet edder sie ga vor deme herden . Van yewilkem perde ses pe(n)nighe . dat iarich is . vnd der weẏde ouer deme nẏen weghe . edder vor / demenẏen weghe bruket . van yewilkem swine eẏnen pe(n)ni(n)gh . dat der weẏde bruͮket . des ghelik van den scapen . van yewilkeme / scape eẏnen pennigh . dat der weẏde . bruket . vnd(e) yewilkem voder howes enen pe(n)nigh . dat vppe den wischen . die ouer deme nẏen weghe / ligken . ghewoͮnnett wert . Vortmer die Jenne die den berchfreden buͮaren . dẏ scolen achtink dar vp hebben . eft ẏemet meẏde vnd(e) begra/sede der stad weẏde ouer deme Nẏen weghe . vnd(e) holt howe in deme meẏnen holte . ouer deme nẏen weghe suͮnder orlof . den scolen sẏe / panden . alzo den dẏe sie meẏgede vnd(e) begrasede der stad weẏden ouer deme nẏer weghe . scolen sie panden . vor twe scillinghe . vnd den die / sie holt howe . edder ghehowen hedde in deme meẏnen holte . ouer deme nẏen weghe . suͮnder orlof . scolden sie panden . vor vir scillinghe / vnd desse broke scalme nemen suͦnder gnade . vnd me scal die hebben mẏt dem ghelde van dem queke . vnd van dem howe tuͦ den kosten / den berchfrede tuͦ holdende . vnd tuͦ beterende . vnd wes hir ane entbreke . dat me mer scolde vt gheuen tuͦ den kosten . des borchfrede . dar / scole wie . vnd willen die helfte van to buten . vnd sie dẏ ratma(n)ne der olden stad tuͦ Soltw(edel) die a(n)dern helfte . worde dar auer wes ouer / dat scolme ok in der mate holden .Alzo dat wie denne des . die helfte vnd(e) sie dẏ ander helfte vpnemen scolden . Ok scalme dar twe Ratma(n)ne / tuͦ setten . alzo enen vt vser stad . vnd(e) enen vt erer stad . dẏ dit gelt vp nemen . vnd dar mede tuͦghen scolen . wes me toͮ deme borchfrede / vnd dar vppe bodarf . vortmer scalme jo enen Ratman die van vser edder van orer stad sie . dar tuͦ stikken . vnd hebben . die den / berchfrede vorsta . vnd(e) bvare vir wekene . Alzo dat die Ratma(n)ne van der olden stad dar enen toͮ stikken dẏ one Inne hebbe vnd buͮare / die ersten vir wekene . vnd wẏ enen die en dar negest vir wekene bvare . Vnd(e) alzo vort den berchfrede tuͦ holdende vnd(e) tuͦ buarende / alle die tit . dẏe wie en dar hebben . vnd holden willen . vortm(er) v(m)me die broke in deme eschen holte . vnd(e) in eẏkene vnd in deme heẏn holte(n) / scalme holden . Alzo die van oldinghes ghe holden sint . . In eẏnebetuͦchnisse desser dink . is vser vo(r)ebenomeden stad Inghezeghel / ghehanghen an dessen opene brif . Ghe gheuen na godes bort Druͮtteẏnhuͮndert iar dar na in deme drie vnd souenstighestem Jare des mandaghes In deme paschen . .