Wy her Guͤmprecht van Wantsleue . ridder . vnde ver beata des suͦluen hern guͦmprechtes eleke huͦsvrowe mechtech Lẏues sẏnne . vnde aller vser redelicheẏt / were dat vs de dot ver snellede . so schicke wẏ . setten . vnde maken vse testament . In desser wẏse . alse hir na ghe screuen steẏt . vnde willen vnde / be gheren . dat it ghanz vnbrocleken ghe holden werde . To deme ersten male gheue wẏ in de ere godes vor den heẏl vnde salicheẏt vser selen / vnde Juͦtten vser dochter vnde vser elderen sele vif stuͦcke gheldes in deme dorpe to Cetlinge jarlikes pachtes vnde rente . mẏt alleme rechte . van / den teẏn stuͦcken . de wẏ her Guͦmprecht , vnde ver beata vor ghenomet ghe koft hebben van albrechte van aluensleue . In deme suͦluen dorpe to Cetlinge / alse de briue vt wẏsen de wẏ dar over hebben . Den wẏsen vnde den bescheẏden Luͦden . den altaristen de nuͦ sẏnt vnde noch to kom(m)ende synt . In den / kerken der hilghen Juͦncvrowen suͦnte marien . Laurencij . Nẏcolai . vnde suͦnte katherẏnen . In den steden to Soltwedele . alse dat de suͦluen altaristen scole / ewliken alle daghelich ghe nuͦchliken gheuen ghuͦden reẏnen verschen wẏn . to allen mẏssen . deme Sẏnghen vnde Lesen schal to allen altaren . de nuͦ sẏnt / In den vorghenomeden kerken . Were auer . dat de vorghenande albrecht van aluensleue edder sine eruen de vorghenomeden teẏn stuͦkke gheldes In / deme dorpe to Cetlinge wedder koften . So scolen de altaristen . de denne sẏnt . nemen vnde vpboren . veftech mark brandenborghes suluers van / deme ghelde des wedder kopes . vn(de) keren dat in wisse guͦlde vnde rente . alse se erst konen vnde moghen . vnde gheuen dar ave den wẏn . alse / hir vorscreuen steẏt . Vortmer van den anderen vif stuͦcken . de wẏ ghe koft hebben van albrechte van aluensleue In deme sulue dorpe to Cetlinge(n) / be scheẏde wẏ vnde gheuen . eynen stuͦcke gheldes deme altaristen des altares des hẏlghenLẏchames . vnde suͦnte marthen . In vser vrowen kerken to / Soltwedele . dar he schal mede beghan Laten ewliken alle jarlikes . dre memorien . vser . hern Gruͦmprechtes . ver beaten vnde Juͦtten vser dochter . / vppe so danne tẏde . alse eyn islich vser steruet . mẏt cappellanen vnde mẏt schuͦlren . In der suluen kerken to vser vrouwen . Vnde to dem klostere / der baruoten . dre memorie(n) vppe de suͦluen thẏde mẏt vilghen vnde mẏt selemẏssen nach der macht vnde der eschẏnge des suluen stucke gheldes / Ok gheue wẏ eẏn stuͦcke gheldes van den suluen vif stuͦcke gheldes den heren van dem hylghengheste . Vortmer den vrouwen In deme klostere / to dambeke gheue wẏ eẏn stuͦcke gheldes van den vorbenomeden vif stuͦcken gheldes . dat se ewliken twẏge beghan alle jarlik dechnẏsse vser . / Hern Guͦmprechtes . ver beaten vnde Juͦtten vser dochter . vppe de thyde alse wẏ her Guͦmprecht vnde ver beata van desser werlde scheẏden . / vnde schollen gheuen den Cappellanen vnde deme schulre . ver schillinge van deme suluen stuͦcke gheldes . to der suluen jarlikes dechnẏsse . Were / auer dat de vorbenomede albrecht . dat erghenomede ghud wedder kofte . So schalme van deme ghelde des wedderkopes gheuen . deme altaristen / des vorbenomeden altares des hẏlghen Lychames . teẏn mark suluers . Den heren to deme hilghengheste . teẏn mark suluers . Den vrouwen to / dambeke teẏn mark suluers . dar se mede kopen ewlike jarlikes rente . dar se vor duͦn . alse hir vor screuen steẏt . Ok gheue wẏ van deme wed=/der kope der vorghenomeden rente twintech mark suluers . den klosteren . Marẏendale . vser vrowen berghe . suͦnte margen borne . Olden hal=/desleue . vnde Neyendorpe . dar se vor scholen denken vser hern guͦmprechtes . ver beaten . vnde Juͦtten vser dochter . Alle desse vor screuen stuͦcke / vnde en elik be suͦnderen wil wẏ her Guͦmprecht vnde ver beata vorghenomet stede ganz . vnde vast holden . Oft wẏ se nẏcht wedder / reden vnder wedder spreken in vser wolmacht by vseme Leuende . Vnde setten schycken vnde stedeghen vses Jeghenwardeghen testamentes / vnde vses Lesten willen . vormuͦndere vorstendere vnde entschẏchtere den deken . vnde den kemerer . de to der thẏd synt des kalandes . / der altaristen . der erghenomeden kerken vser vrouwen To Soltwedele . Vnde hern Johanne buͦck . vnde hern arnde van Pokebuͦsch prẏstere To / ener groteren tuͦghẏnge . huͦlpe vnde vuͦlbord des Jeghenwardeghen testamentes hebbe ik beseghelt dessen bref . vnde mẏt mẏ her guͦmprechte / hinrik w(er)ners sone . vnde hinrik hinrikes sone ghe heten van der schuͦlenborch . De ghe gheuen is na godes bord druͦtteẏnhuͮndert jar In de=/me ses vnde seuenteghestes jare in suͦnte bartholomews Daghe des hilghen apostoles . /