Wẏ her albrecht Conow(e) prouest tho Soltw(edel) Bekenne(n) In desseme open bre/ue . dat her hinrik pistoris eẏn vicarius in vser kerken . vnde heẏne Kalue / eẏn borgher van lubeke . hebben vor vns bekant dat se hebben en tweẏ / ghesat vn(de) berichtet . heẏnen wende vnde heẏne(n) schy(m)mi(n)ghe vm al ere / twẏdracht vn(de) schelinghe In desser na schreuen wise . To deme erste(n) male / vmme den anderhaluen wẏspel Rogghen gheldes vn(de) Tegheden to sa(n)nem / dat de na dode der drẏger klostervrowen de dar mede beliftuchtighet sint . / schal half vallen mid alme rechte an heẏnen wende vn(de) an sẏne Erue(n) . / vn(de) de ander helfte an heẏne(n) Schy(m)mi(n)ghe vn(de) an sẏne Eruen . des Richtes / vn(de) denstes scholen se beẏde eẏndrechtliken bruken vn(de) erer neẏn besun=/dern . vn(de) vmme den tẏns de en an ghestoruen is Indeme bokhorni(n)ghe¹ / eẏn punt . In Rickers erue eẏne mark pe(n)ni(n)ghe . vor der Tzingheln achte / schillinghe . de tẏns schal erfliken blẏuen bẏ heẏne(n) Kaluen vn(de) Heẏnen= / schuy(m)mi(n)ghe vn(de) bẏ eren rechten Eruen . Des hebben se heẏnen wende dar / jeghen ghelaten ver vn(de) twintich schillinghe gheldes dede stunden vp siner / wisch . vortmer sint twe mark tẏnses In deme stouen vor der borch de=/noch de dre klostervrowen besitten tho erer drẏger lẏue de schole(n) vallen / an Heẏnen kaluen . Heyne(n) Schy(m)mi(n)ghe vnde Heẏnen wende vnd(e) an ere rech=/ten eruen . vortmer heft heẏne Schy(m)mi(n)ghe . Ses mark suluers de schal he / legghen an Rente als he erste kan de Rente scholen vp boren tho erem / lẏue de vor schreue(n) dre klostervrowen . Alheẏt vn(de) Ghebe Schy(m)mi(n)ghes / vn(de) alheẏt wendes vn(de) na erem dode schal de Rente vallen . an heẏnen / Schy(m)mi(n)ghe . vn(de) an heẏnen wende vn(de) an ere Eruen . Mid dessen vorschre=/uen stukken schal berichtetwesen al ere twẏdracht vn(de) vnmoͮd den se / vnder sik ghehat hebben . vn(de) alle desse vor schreuen stukke vn(de) schedi(n)=/ghe hebben se . heẏne Schy(m)mi(n)gh vn(de) heẏne went muntliken ghevulbor=/det In vser Jeghenwardicheẏt . vn(de) desser na schreuen tuͦghe vnde ghe / wilkoret . stede vn(de) vaste tho holdende . Tughe desser dingh sẏnt de Erli=/ken luͦde . her Johan Schy(m)mi(n)gh . her hermen zeltzingh . Meẏster Ghẏso / Brewesse . hans schorlubbe vn(de) hans van deme houe borgher to soltw(edel) / To eẏner grotern bekantnisse vn(de) tuchnisse desser schedinghe so hebbe / we vse Inghezeghel wẏtliken ghehenghet an dessen bref . De gheuen / is nach godes bord drẏttheẏnhundert Jar dar na Indeme acht vnde / achtighesten Jare . In sunte vitalis daghe des hilghen merteleres . /