Wy Dẏderẏk laghendorpe Claws godschalk Ghereke Brunow Hans Berteldes Bernt leppin Kersten ro/reberghe Bode vitten Wolter Hartwẏghes Hans stappenbeke Dẏderẏk spen(n)ighe Bernt dorheẏde vnde He(n)ingh / van wopelde Ratmanne der olde(n)stat to zoltwedele Bekenne(n) openbare in desseme brẏue Dat wolter hart/wẏghes hans hartwẏghes sone vse medecumpaen vses rades heft vorcoft vnde vorlaten sin erue vn(de) hof=/ mẏt aller to Behoringhe stande vnde beleghen bẏ deme erue dar tẏdeke van gartze selẏger dechtnisse / inne vorstarf den erlyken heren hern Bernde duuele dekene hern hinrẏke mẏlligese kemerere vn(de) / den meẏnen broderen des kalandes der prẏstere mẏt vs to zoltw(edele) de nuͦ sint vnde noch to comen moghe(n) / to Besittende to ewẏghen tẏden vor Druddehalue mark vnde twẏntich brandenborghes suluers vn(de) heft / den sulue(n) heren des kalandes dat vorscreue(ne) erue vnde hof mẏt aller to behoringhe vor vs mẏt ener / eyndrechtlyken volbort alle vses rades olde vnde nẏge vorlaten in desser wẏse dat de heren des kalandes / van deme sulue(n) erue vnde houe scholen dun alle plycht vser stat alse vse borghere van eren erue(n) dun / De ghank de dar buwet ẏs van deme suluen houe wente vppe vser stat muͦre des wẏlle wẏ vnde vse / nacomlinghe scholen des mechtich wesen to brekende vnde to büwende . wolde wẏ ok dat men dar vp vn(de) / af stẏghen scholde so scholde wẏ den vpghank vnde afghank maken van Buten to bẏ vs(er) stat muͦren / mẏt ledderen eder mẏt treppen alse vs dat bequemest were dat de kalant an eren buwe dar vn=/becu(m)mert mede blyue Doch so scholen se nẏnen ghank hebbe(n) ouer de mure vs(er) stat . To tughe vn(de) / merer bewẏsinghe alle desser vorscreue(n) stucke hebbe wẏ vs(er) stat ingheseghel laten henghen mẏt vs(er) / aller wẏtschop an dessen brẏf Gheue(n) na godes Bort drutteẏn hundert jar in deme achte vn(de) achtẏ/ghẏsten Jare in alle godes hẏlghen auende /