Ik hinrẏk bremer sakeweldeghe vnde wẏ ghert van wostrow vnde he(n)nẏngh vletmer borghen vn(de) medeloue/re wẏ alle Bekenne(n) openba(r)e in desseme bryue vor allen luden de ene seen horen eder lesen dat wẏ schuldich . / sint deme rade in der olden stad zoltwedel achteẏn mark lune(n)borghere pe(n)nẏnghe alse nuͦ ghenghe vnde / gheue sint in deme lande to lune(n)b(or)gh vor hinrẏk bremers schattinghe vorghenomet De vorscreue(nen) ach/theẏn m(a)rk scholle wẏ vnde wẏllen en wol to danke bereẏden vn(de) betalen in der stad zoltw(edel) nuͦ to sunte Ja/cops daghe neghest tho comende mẏt reden pe(n)nẏnghen eder mẏt nughaftighen panden dar se desses / vorscreue(n) gheldes mede becomen moghen by crẏsten eder bẏ Joden vn(de) to den panden vul to dunde alse / pandes recht ẏs . dat loue wẏ hinrẏk bremer ghert van wostrow vn(de) He(n)nyngh vletmer alle vorghe/nomet mẏt ener samenden hant deme rade in der olden stad zoltwedele wol to heldende sunder vor/toch vn(de) hulperede . vnde we(r)t dat wẏ en desses vorscreue(nen) gheldes nicht beredden vn(de) betaleden vppe de(n) / vorghenomeden sunte Jacops dach alse vorscreue(n) ẏs welk vsern se denne mane(n) v(m)me de samende hant / de schal se en holden ofte se eme de mẏt rechte tho bracht hedden alle desse vorscreue(nen) stucke loue wẏ / hinr(ẏk) bremer ghert van wostrow vn(de) he(n)nẏngh vletmer alle erghenomet mÿt ener samenden / hant deme rade in der olden stad zoltw(edel) wol to holdende sunder alle lẏst . Ok beke(n)ne yk hinrẏk / bremer vorghenomet dat yk nicht schal noch wẏl loes sin van deme rade in der olden stad zolt/wedele der venghenisse de yk en ghelouet hebbe desse vorscreue(nen) achteẏn m(a)rk pe(n)nẏnghe sin en vul / vn(de) al betalet dat en nughet . to tughe vn(de) merer bekantnisse alle dess(er) vorscreue(nen) stucke hebbe wẏ / hinrẏk bremer ghert van wostrow vn(de) he(n)nẏngh vletmer alle erghenomet vse ingheseghele hen/ghen laten an dessen brẏff . Gheuen na godes bort druttheyn hundert Jar in deme neghen / vn(de) neghenteghẏsten Jare des andren sondaghes na deme , passche daghe /