Ik Luder meÿger borgher in der olden Stad Soltwedel vnde mÿne rechten / erue(n) beke(n)nen apenbar tugende vor alsweme de dussen breff seen horen / edder lesen dat ik hebbe vorkofft vnde vorkope mÿt fulbort mẏner / rechten eruen recht vnde redelken to enem rechten erffkope Sos schepel / rogghen jarliker pachte vnde renthen in gherke Schernckowes haue / to Czitenisse den he nu to der tÿd bewanet dem vorsichtighen bescheÿden / ma(n)ne kersten honnekesbuttel sẏne(n) rechten erue(n) vnde dem hebber dusseß / breues mÿt sÿne(n) guden willen dar mÿ de vorscreue(ne) kersten vor gheuen / vnde vor nughet hefft twintich mark pe(n)i(n)ghe Soltwedelscher weringhe / de in mÿne vnde mÿner erue(n) nüt vnde framen kamen sÿnt de vorbe/nomden Soͤs schepel rogge(n) schal gherke Schernckow effte sÿne erue(n) / edder de besitter des hauͮes alle jar vppe Su(n)te merte(n)s dach vt gheue(n) / vnde bringhen in de Stăd Soltwedel dem vor screue(nen) kersten edder / sÿne(n) mede tobescreuen weret dat de Soͤsschepel rogghen jarliker / pachte vnde renthe so nicht entrichtet worde alse vor screuen steÿt / so mach de vor screue(ne) kersten edder sÿne mede tobescreuen dar v(m)me / panden effte panden laten alse pandes recht is edder mÿt gheÿstlike(n) / rechte manen wo em dat beqwemest is dat schal wedder mÿ edder mÿne rechten eruͮen nicht wesen vnde schullen vnde willen en dar / to behulpen sÿn wa(n)ne vnde wo vaken se dat van mÿ effte mÿne / erue(n) esschende sÿnt weret ok sake dat de vor screuen hoff vor / wustede dar god langhe var sÿ so schal de vor screue(ne) kersten edder / sÿne mede to bescreuen sÿk des hauͮes bruken mÿt aller tobehorin=/ghe in acker in wisschen in weÿden effte in holten wo me des hauͮes / tobehoringhe bruken mach so langhe wente se eres pachtes naka=/men sÿnt Vnde hebbe de gnade des wedder kopes hir ane beholden / in sodemer wise wen ik edder mÿne rechten eruen dem vorscreue(nen) / kersten effte sÿne(n) rechten erue(n) edder dem hebber dusses breues / mÿt orem guden willen wedder gheue sodane twintich mark pen=/ni(n)ghe alse vor screuen steÿt vppe Su(n)te merte(n)s dach mÿt aller vallen / renthe so erst sÿnt mÿ vnde mÿne(n) rechten erue(n) de Soͤs schepel / rogge(n) jarliker pachte vnde renthe qwit leddich vnde loͤs hir¹ an / vnde auer sint ghe wesen de vorsichtighen lude alse hinrik Czel=/uͮelde Bartold Cleÿnow vnde Franke vesen borghere to Soltwedel / in der olden Staͤd vnde to groter bekantnisse vnde wissenheÿt / hebbe ik mÿ(n) ingeseghel vor mÿ vnde mÿne eruen laten henghen / witliken nedden an dussen breff de screuen vnde gheuen is na / gades bord dusent jar virhu(n)dert jar dar na in dem Soͤsvndevirti=/ghesten jare inder hilghen driger ko(n)ni(n)gh daghe /