Wy Borgermeste(r) vnde Radma(n)ne der Stad Soltwed(e)ll Beke(n)nen openbar in duss(e)m / breue tuge(n)de dat vor vns is gewesen her(e)n hinrich Cessun selig(er) . dorch syner / der synen . vnde aller cristen zyelen salicheid willen , gode von Hy(m)mel . syner moder / Marie vnde alle gods hilgen to loüe vnde to eren . hefft belecht vnde gemackt to / ewige(n) tyden bliue(n)de achte m(a)rc pen(ninge) Jarliker rente vns(er) Stad wer(in)g(e) bi vns / vor eynen su(m)men geldis , den wij furder in degnüt vnde vrome(n) vnsir Stad ge/kered hebb(e)n , dusse achte m(a)rc pen(ninge) ewiger renten schullen denen to b(e)hueff eyner / sunderken Co(m)menden in su(n)te Katherine(n) kerken mit vns to Soltw(ede)ll . de eynem vro=/men p(re)ste(r) efte clerico de Im suluen Jar(e) prester werd . dar wen em god de gnade / gifft mysse stede to holdende So vake des nod werd syͤnde to beuele(n)de . vnde de sulue / prester(e) oft hebber(e) der Co(m)menden schal vul vnde al vpheüen alsodan(e) vorbeno(me)de / Rente alle Jar to veer tijden to jewelker tijd twee m(a)rc pen(ninge) van vnsem(en) Radhuse / sunder vortoch Weret sake dat dusse p(re)ster(en) den dusse Co(m)mende beualen worde / suluen sy nicht wolde belegen So schal he holden eyne(n) Officianten(e) . dem(e) schal he / laten volgen alle Renthe . de dar to gmakt ẏs . ffurdermer is ok vor vns gewes(e)n / her(e)n Dyderich kerkuͤn hebber(e) duss(er) Co(m)mende . v(m)me salicheid vnde meru(n)ge will(e)n / god(e)s dinstes , hefft blecht vnde gmakt . to duss(er) suluen Co(m)mend(e)n Neghen m(a)rc pen(ninge) / Rent(e)n nü to dusser tijd vpp hans werner hoüen , twe pund rent(e)n vor vefftich m(a)rc / pen(ninge) vpp hermen lysten huse . twe pund pen(ninge) Rente(n) vor vefftig m(a)rc p(e)n(ninge) vpp Jacob her/steman huse vnde Garden twee m(a)rc Rent(e)n vor druttich m(a)rc p(e)n(ningen) , vnde vpp hinrich /Mechowen huse des pylsers twe m(a)rc Rent(e)n vor druttich m(a)rc p(e)n(ninge) , yssed sake dat / dusse su(m)me geldis . oft eyn deyl , werd wedder affg(e)kofft So wil wij vndeschull(e)n / dar truwelk(e)n vnde mit gantz(e)m flite mit hulpe vnde Rade des p(re)sters dem(e) desse / Co(m)mende beuol(e)n ys , an gude wisse Rente to der sulue(n) Co(m)mend(e)n B(e)hueff , dar ewich/liken bi to bliue(n)de wedder b(e)leggen So wy erst konen Ok v(m)me mer(er) sekerheid / willen vnde guder huͤde . hefft her(e)n Dyderich vor sig vnde hebber(e) duss(er) Co(m)mende / de hoüetbreue der Negen m(a)rc Rent(e)n by vns gelecht vpp vnse Radhus . dar sye / to vorware(n)de glich vnsen and(er)n breuen , To dussir suluen Co(m)mend(e)n hefft g(e)geuen / her(e)n dyderich vorbenomed . syne woni(n)ge b(e)legen vorm(e) waterdore , de ander / bode vam(e) orde vortm(er) twee verdeboke vnde eyn Blawgerwed mit allem(e) ge/rede Dusse sulue Co(m)ende hefft eyn vorgulded(e)n kelk . eyn gud missebuek . eyn / gulden stucke . eyn suluern petzecrütze . twee appull(en) vnde eyn werkeldags ger/wet : dar vor vnde wen wij denn(e) godsdinst trüwelk(e)n sterken ferder(e)n vnde / meren so dat dy beuelinge duss(er) Co(m)mende in ewiger dechtnisse blifft tidlic v(er)ward / vnde belegen werd hefft de Erbeno(me)de her(e)n Cossan selig(er) . al Jare gmakt vpp vnsem / Radhuse dree m(a)rc p(e)n(ninge) den sitte(n)den Borg(er)mest(er)n vnd(e) Radmanne(n) to geue(n)de . dar to wil / her(e)n Dyderich . oft hebber(e) der Co(m)me(n)den dem Rade alle Jar schenck(e)n Im adüente eyn / m(a)rc pen(ninge) van den negen m(a)rc Renten V(m)me meru(n)ge willen Godsdinstes geuen [den vryg] ? / de woru(n)ge dussir Co(m)end(e)n van aller stadplege . ane twee schill(inge) p(e)n(ningen) to schate . dar / alle Jar van togeue(n)de To orkunde vnde fforder(er) b(e)kantnisse hebbe wij Radmann(e) / vorbenomed(en) vnser Stad Ingesegel vor vns vnde vnse Nacomel(inghe) witliken mit gud(e)n / willen geheng(e)d lat(e)n an dussin breff G(e)geuen nach (cristi) g(e)bord vertenhu(n)dert Jare / dar na in dem Eynvnd(e)vefftigist(e)n Jar(e) des auendes Sancti andree des apostolen /