Wÿ Jacob mechow kole gladegow Hans rodenszee Clawes moller Ludeke holtorpp / Hans besendal Jurgen schulte Clawes brewitze Cord woleman Hans mu(n)er Herman / chud(e)n Hoÿger wittekop Hans groteian wilhelm wolter Hans merÿn werner schermer / vnd(e) Hans gusseuelde Radma(n)ne to Soltwedell Beke(n)nen ope(n)bar(e) mit disem brefe tugende vor / alszwem(e) dat In vnser Jegenwordicheid He(n)eke bünersz . Hans bernersz zeligen(e) wandag(en) / borger(e) In vnser Nigenstad . sone . hefft vpgegeuen vnd(e) vorlat(e)n sÿne wisch , an der Jeͤszer / bÿ su(n)te Jurgensz wisch beleg(e)n . Jacob mechouw(e)n vnd(e) Hans werkmester(e) vorstender(e)n / der Capellen vnd(e) hospitalis vpg(e)nant(e)n su(n)te Jurgens vor vnszer Stad beleg(e)n vnd(e) or(e)n / nakomelingen to der Capellen vnd(e) hospetal(e)n behuͦff mit aller rechticheid vnd(e) in aller / mat(e)n so de sulffte He(n)neke dar mede beeruet sÿ vnd(e) bette an disse tijd hefft beset(e)n . sick offte / sÿnen eruen neÿnerleÿe hir ann(e) tobeholden(e)n So dat der vorscreuen Capellen vnnde / hospital(e)n vorstender(en) . sodann(e) wisch gelijk den ander(e)n der sulue(n) Capellen vnd(e) hospital(e)n / liggenden gru(n)den vnd(e) guder(e)n In der Capellen vnd(e) hospital(e)n nuͦtt vnd(e) fromen gebruken / wy(n)nen vnnd keren vnd(e) wenden moghen wur id on alder bequemest dunket nutte vnd(e) / behuͦff syn De sulue He(n)neke ok den vpgenom(e)den vorstendere(n) vnd(e) or(e)n nakamelingen / to der Capellen vnd(e) hospitalis behuͦff de vo(r)scre(ue)n(e) wisch vpghifft vorleth vnd(e) vor sick vnd(e) / sÿne eruen aller rechticheid de hie to der sulue(n) wisch gehath hefft vortippet vnd(e) dar gentzlijk / affleth In vnd(e) mit crafft dises brefes To orkunde hethen wy vnser oldenstad Inghesigil / witliken hang(e)n het(e)n an disen breeff Na cristi vnses her(e)n gebord virteÿnhundert Jare / dar na Im(e) Nege(n)tigestem(en) Jare Am(e) Sonauende na Reminiscere In der vasten /