Wy Role Gladegow Hans Rodense Clawes Molre Hans Werckmester Lutke Holtorpe Jurgen Schulte Hoger wittecop Cordt / woleman wilhelm wolter Hans Munter Hans merin diderick Brewitze Kersten Hinricks werner Schermer Hans / Gusseuelde Diderick Chuden Gerke Rademin vnnd(e) Hinrick Milges Ratmann(e) to Soltwedel Bekennen apenbar tuge(n)de / vor alliszwem(e) Dat vor vnns is gewesen vnnse medeborger Ratke wikenberg vnnd(e) heft vorkoft recht vnnd(e) redeliken / to eynem(e) rechten erfkope vorkoft ok in craft vnnd(e) macht desses breues vp vnnd(e) an synem(e) garden by der Jetzen / aldernegest by lange mathias garden belegen achte schilling penni(n)ge iarliger rente Soltwedelscher wer(inge) dem(e) ¹ / Ersamen vnnd(e) vorsichtigen mannen Hans Groteiane Gerke Vrestien vnnd(e) peter Schulten alsze gildemester(e) to Sunte / Nicolaus gilde vnnd(e) eren nakameren vor teyn m(a)rk penni(n)ge Der vpg(e)n(a)nten wer(inge) De szẏe ehme wol to dancke / vornoget vnnd(e) entrichtet hebben Desse vorbenomde achte schilling penni(n)ge schal vnnd(e) wil Ratke wikenberg / vorg(e)n(a)nt efte synes garden besitter(e) alle iarliges to ver tiden des jares alsze to winachten to pasten to Sunte Joha(n)nis / Baptisten daghe vnnd(e) to Sunte Michaelis dage to isliker tijd myt twen schilling penni(n)ge der suluen wer(inge) / Denn(e) vorgenomden gildemester(e)nn efte eren nakameren sunder vortoch entrichten vnnd(e) betalen Doch so heft / Ratke wikenberg vorg(e)n(a)nt vor sijck efte synes garden besitter(e) beholden den wedderkop der achte schilling pe(n)ninge / iarliger rente also wenner dat ehme efte synes garden besitter(e) beqwem(e) is mogen sie sodane teyn m(a)rk pe(n)ni(n)ge / houetstols dem(e) genomden gildemester(e)nn efte eren nakomeren myt allen bedageden nastelligen renten / vul vnnd(e) al entrichten vnnd(e) betalen wanner denne de betalinge also geschen is so schollen Ratken wikenberg /efte synes garden besitter(e) sodane achte schilling penni(n)ge iarliger rente wedder qwid frijg vnnd(e) desse breff / machtlos syn Dusses to furder kantnisse vnnd(e) wissenheit hebben wy vnnse der Nigenstadt Ingesegel hangen / heten an dessen breff Na cristi vnnszes h(e)rnn gebordt verteinhundert iar dar na(e) in dem(e) drevnd(e)negentigestem(e) / Jar(e) des don(e)rdages na Galli /