Wy hans rodensee Diderick brewitze Otte vyntzelberch hans besendal hoyer witte­kop wilhelm wolter herme chuden diderick / chuden Gerke rademyn hinrick mylliges Rad­mann(e) der Oldenstad Soltwedel Bekennen apembar(e) myth dussem(e) brefe betugen(en) / vor alswem(e) dat Jn vnser Jegenwardicheyth syn gewest Werner scher­mer vnde Diderick schulte vorstender(e) der kerckenn / vnser leuen frowen Jn vnde an den Jarliken renthen tynszen pachten vnd(e) allen ander(e)n vpkomen der suluen kercken recht / vnde redeliken vorkofft hebben vorkopen ock in vnde myth macht dusses brefes Mette(n) hans berckmers zeliger nagelaten / wedewe to eynem(e) rechten lyffgedinge veer Rinsche gulden Jarliker renthe vnde Eynen haluen wispel roggen Jarlikes pacht(es) . / dar var(e) sie den vorbenomeden vorstenderen eynen gna(n)ten su(m)men geldes wol to dancke vornoget vnde betalet hefft Dusse / veer(e) rinsche gulden willen vnde schollen de vorbenomeden vorstender(en) vnde ore na­komelinge der gna(n)ten Metten alle jarliges / to veer tyden des jares also to passchen Joha(n)nis Michaelis vnde wynachten to ichliker tyd Eynen rinschen gulden geuen vnd(e) / vpp Martini den haluen wispel roggen sunder vortoch vnde weddersprake entrichten vnde betalen de tyd ores gantzen leue(n)des / Wa(n)ner(e) denn(e) de sulue Mette nach dem(e) willen godes dodeshaluen vorfallen is de(n)ne willen vnd(e) schul­len de suluen vor­stender(en) / vnde ore nakome­linge Anneken koken Clawes koken vnses medebor­gers dochter alle jarlikes so vor­screuen is tobetalende / nomeliken des ferndel jares dre orde goldes vnde dar(e) to alle jarliges ock den haluen wispel roggen vppe de vor­screu­en(en) / tyd tobetalende ock de tyd ores gantzen leue(n)des so verne sie sick fromeliken holt vnde in eren bestadi­get worde dat sy / gheystlick effte werlick weret ouerst dat sie sick vnfromelick hedde so schollen dusse vorscreu­en(en) lyffrenthe blyuen by / dem(e) godeshuse vnser leuen frowen Wanner(e) de(n)ne nach dem(e) willen godes de sulue Mette berckmers vnd(e) Anneke koken / alle beyde dodeshaluen vorfallen syn schollen der kercken vnser leuen frowen sodann(e) vorscreuen(e) lyff­renthe wedder loesz / qwith vnde fryg vnde dusse breff machtlosz syn Desz tobekant­nisse hebbe wy vnser Stad Ingesegel witliken hangen / heten an dussen breff Nah (Christi) vnses her(e)n gebord Vierteynhundert Jar dar(e) na Jn dem(e) viffvndenegenti­gesten Jare / Am(e) dage dece(m) miliu(m) militu(m) marter(um) ¹