Wÿ Hans Rodensee Diderik almgkstede Diderick Breuitze Ludeke holttorp Otto vinczelberg / Herman lijsten Hans Besendal Hoyger wittekop Jacob alem wilhelm wolter Hans groteian / Herman chuden Hans meryn Diderik chuden Kersten hinrekes Gherke Rademyn Hans / gusseuelde vnd(e) Hinrik milges Ratma(n)ne to Soltwedel Bekenne(n) apenbar(e) mit dessem(e) breue / thugende vor alszwem(e) dat In vnser Jegenwardicheit Bernt Moller vnse medeborgher hefft / vorkofft recht vnd(e) redeliken to eynem(e) recht(e)n erffkope vorkofft ok in crafft disses breues / vp vnd(e) an synem(e) kampe vor dem(e) Bockhorniger dare twysscher der wynt molle(n) vnd(e) / dem(e) Bockhornighe beleghen dem(e) Erafftigher her(e)n Theodorico Riesteden Prester vnd(e) / den hebber dusses breues mit syne(n) willen twe mark pe(n)ninghe jarliger rent(e)n vnser / Stad weringe vor veertich mark pen(n)i(n)ge der sulften weringe de em(e) wol to Dancke / vornuͦget vnd(e) betalet syn Disse twe mark pen(ninge) Jarliger renten wil vnd(e) schall Bernt moller / vpg(e)n(an)t vnd(e) synes kampes besitter(e) Den erbenom(e)den her(e)n teodor(i)co Riestede vnd(e) syne(n) mede/to bescreue(nen) all Jarlikes to vijr tijden des iares Alse to winachten to paschen to su(n)te Joha(n)nis / daghe midde(n)somer(en) vnd(e) tho sunte Michaelis daghe to ichliker tijd Achte schillingk pen(ninge) / der vorgescreue(nen) weringe sunder vartoch vnd(e) weddersprake entrichten vnd(e) botalen Doch / den suluen Bernd Moller vnd(e) den b(e)sitter synes kampes Den wedder(e)kop hijr ann(e) tobeholdende / Alsze wanner on dat so bequem(e) sÿ De(n)ne moghen vnd(e) schollen sie den vpgenom(e)den her(e)n / teodor(i)co vnd(e) syne(n) medetobescreue(nen) Sodan(e) veerthÿch mark pen(ninge) houetsu(m)men mit allen / bedageden nastellighen rent(e)n vull vnd(e) all entricht(e)n vnd(e) betalen vnd(e) alsede(n)ne scholle(n) om(e) / vnd(e) synes kampes besitter sodan(e) twe mark pen(ninge) jarliker rent(e)n wedder losz qwijd vnd(e) / fryg vnd(e) dusse breff machtelosz syn To orkunde hebben wy vnser olden stad Ing(esegel) witlik(e)n / hangen heten an dissen breff Nha cristi vnses her(e)n gebordt verteynhundert Jar dar(e) na / Im(e) vijff vnd(e) negentigesten Jare Amm(e) frigdage sunte petri ad vinc(u)la auende /