Wy Role gladegow Hans rodense Clawes molre Hans werckmester(e) Ludke holtorpe Didirick brewitze Jurgen schulte Hoyer / wittekop Cord wolema(n) Didirick chuden Hans merryn Harme chuden werner(e) schermer(e) Kersten hinrickes Gercke Ra/demyn Hinrick milges Hans gusseuelde vnnde Didirick boek Radma(n)ne to Soltw(edel) Bekennen apenbar(e) tugende vor alswem(e) / dat vor(e) vnns is gewesen vnse medeborger(e) Tyde boek vnnde hefft vorkofft recht vnnde redelken to eynem(en) rechten / erffkope vorkofft ock In crafft desses breues vp vn(nde) an synem(e) husze In der breden strate by herme(n) othmors husze belegen / twe marck pen(ninge) vnser Stad wer(inge) Jarliger(en) rente den Ersamen vnnd(e) vorsichtigen Kersten hinrickes Meyneke wikenberge vnnd(e) / Hans wogen Gildemester(e) vn(nde) vorweser(e) des hilgen licha(m)mes gilde vnnde eren nakomer(e)n vor(e) viertich marck pen(ninge) / pen(ninge) der(e) vpg(e)n(an)t(en) were de se ohm(e) wol to Dancke vornoget vnnde entrichtet hebben Desse vorbenom(e)de twe marck pen(ninge) / schal vnnde wil Tyde boek vor(e)g(e)n(an)t offte synes huses besitter(e) alle Jar(e)liges to vier(e) tẏden des Jares alsze to paschen / to sunte Joha(n)nis baptisten dage to sunte michahelis dage vnnd(e) to wẏnachten to isliger(e) tyd myt achte schillingk / pen(ninge) der suluen wer(inge) den vor(e)berorden Gildemester(e)n offte eren nakomer(e)n sunder vortoch entrichten vn(nde) betalen / Doch so hefft Tyde boek vor(e)g(e)n(an)t vor sick vnnde synes huses besitter(e) beholden den wedder(kop) der(e) twe marck pen(ninge) / jar(e)liger(en) rente alsze wanner(e) dat ohm(e) offte synes huses besitter(e) boquem(e) is mogen se alsodan(e) viertich marck / houetstols myt allen bedageden nastelligen renten den vakenom(e)den vor(e)weser(e)n vnnd(e) gildemester(e)n des hilge(n) / licha(m)mes gilde offte eren nakomer(e)n ful vnnd(e) al entrichten vnnde betalen wanner(e) denne de betalinge so voͤr(e)/beroret geschen is schollen Tyde boek vnnde synes huses besitter(e) sodaner(e) twe marck pen(ninge) Jar(e)liger(en) rente wedder / quyd frijg vnnde desse breff machtlos syn Desses to furder kantnisse vn(nde) wissenheyd hebb(e)n wi vnser der Nigen/stad Ingesegel hangen heten an dessen breff Na Cristi vnses heren geborth vierteynhu(n)dert Jar(e) Dar(e) Na Inm(e) / soesvnndenegentigestem(e) Jar(e) anm(e) Mandage Na C(i)rcu(m)cisionis d(o)mi(ni)/