Wÿ Otto vintzelberg Hans besendaͤl Hans werkmester(e) Clawes brewitz wilhelm woltir Hermen chuden Hoẏger wittekopp(e) / Werner(e) schermer(e) Gher(e)ke rademẏn vnd(e) Hinrick milgeß Radma(n)ne der oldenstad to Soltwedel Beke(n)nen ope(n)bar(e) mit disem brefe / tugende vor alszwem(e) dat vor vns gekomen sÿn de Ersamen vnd(e) vorsichtig(e)n Werner schermer vnd(e) Diderick schulte vorstender(e) der kerken / vnser leuen frouwen In vnser oldenstadt vnd(e) de Er(e)nhafftige her(en) Hinrick benekendorp prester(e) mit Gherken beneke(n)dorp sÿnem(e) eeliken vader(e) vnd(e) / de dogetsam(en) frouwe Wibeke zeligen hinrick schibens wandag(en) vnses medeborger(es) nagelaten(e) wedewe vorgheuende so alse in vorgangen tijden vp=/gehofen bestediget vnd(e) beth in disen hutendach geholden sÿn in der vorgescreuen kerken vnser leuen frouw(e)n in jewelker weken Dre votiüen missen / nom(e)liken des Dinxtag(es) to der ere vnd(e) werdicheit des hilig(e)n gheist(es) de erste des don(e)rdages to der ere vnd(e) werdicheit des hilig(e)n war(en) licha(m)mes cristi / ihesu de ander(e) vnd(e) des fridages des hilig(e)n crucis cristi ihesu vnd(e) dem(e) gecrusigeden cristo ihesu to eren vnd(e) to werdicheit de drudde er(e) hebben sie nü vth / mildichliker beweginge vnd(e) oͤthmodiger jnnicheit bÿ sick betrachtet vp dat de suluen dre missen in ewigen wesende bliuen vnd(e) von eẏnem(en) fromen prester(e) dorch / sick sulues offt eẏn ander(e)n so hie dorch noet saken vorhindert worde . mogen bestellet vnd(e) ewichliken geholden werden vnd(e) gru(n)tlijk in gotliker leue de se / to gode vnd(e) den dren missen dragen ouer eÿn gekomen sÿn Dat de g(e)nant(e)n vorstender(en) vnd(e) or(e) nakomelinge to ewigen tijden de sulfft(e)n dre missen / schollen hebben tobeuelende eÿne(n) fromen prester(e) de sie alle wekelinge truweliken moge vnd(e) scholle vorwaren vnd(e) worde hie dar ann(e) sümich offte / wedderwillich , schollen de vorstender(en) to dentijden syͤnde vullemacht hebben de missen von dem(e) prester(e) tonemende vnd(e) eÿnem(en) ander(e)n fromen prester(e) / wedder tobeuelende wa(n)ner(e) vnd(e) wuͦ vaken des werdet noet vnd(e) behuͦff sÿn vnd(e) vp dat de sulffte prester(e) dem(e) de missen beuolen werden deste flitiger / sÿ de missen touorwarende willen vnd(e) schollen de vpgenom(e)den vorstender(en) vnde alle or(e) nakomelinge dem(e) sulfften prester(e) alle jarlike(s) / vp Martini vthe der kerken redesten guder(e)n geuen vnd(e) entrichten Vijff marck pe(n)i(n)ge vnser stad weringe vnd(e) so alle jarliker(s) to / ewigen tijden So de gnante Wibeke schibens sick vnd(e) aller orer(en) leffhoueden selen salicheit to hulpe vnd(e) troste de sulfften vijff mark / to den dren missen by dat godeshus so belecht vnd(e) gekofft hefft dar ewich bÿ to bliue(n)de dar to schal de sulffte prester(e) hebben vnd(e) / alle jarliker(s) vpboren Eÿnen wispel rogg(e)n de int jar(e) dat(um) dises brefes is im(e) dorpe rademÿn In hans stratzeborg(es) haüe nach luͦde / des vorsegeld(e)n brefes von zelig(e)n Mathias von der schule(n)borg dar ouer(e) v(er)segelt den sulfft(e)n wispel rogg(e)n mit sÿne(n) houetsu(m)me(n) / de g(e)nant(e)n Er(e)n Hinrick benekendorp vnd(e) Gher(e)ke sÿn vader(en) in orer vnd(e) alle orer leffhoueden selen salicheit to den sulfft(e)n dren missen gegeue(n) / hebben dar ewich bÿ tobliue(n)de vnde so vaken de affghekofft werd , schollen de vorstender(e) to den tijden syͤnde den houetsu(m)men vp eÿnen wispel / roggen wedder beleggen dat so In ewicheit toholden(en) Ok schal de fundatien , disser suluen Dre votiuen missen vp de votiuen pen(nige) de men(nen) suszla(n)ge / in den votiuen missen den prester(e)n gegeuen hefft vnd(e) ok noch worden boue(n) de v(or)gescreu(enen) rente geuen schollen , an macht bliuen vnd(e) von den vor/benom(e)den vorstender(e)n vnd(e) allen or(e)n nakomelingen ewichliken werden geholden Des to merẏ(e)r wissenheit vnd(e) ewiger tuchnisse hebben / wÿ Radma(n)ne vpgenom(e)t vnser Stad grote Ingesigil vor vns vnd(e) alle vnse nakomelinge witliken hang(e)n het(e)n an disen breeff Na / cristi vnses her(e)n gebord virteÿnhundert jar dar na Im(e) Souen vnde Negentigestem(en) Jare Am(e) Mandage sunte Dionisij Episcopi / vnde syner geselschop daghe /