Vor aller me(n)nichligen watte werdicheid ordens grades states vnd(e) vor(e) wesendes gheistlijck / vnd(e) werltlijck de syn moghen . de disse vnse scriffte seh(e)n hor(e)n offte lesen vnd(e) hir mede be/socht werden Beke(n)nen wẏ Borgermester(e) vnd(e) Radma(n)ne der oldenstadt to Soltwedel / Nach irbedinge vnser willigen steden denste opembar(e) betugende mit disem brefe Dat vor / vns gekomen syn De vorsichtigen me(n)ne Hinrick goden . Schulte . mit twen sÿnen mede=/buren nom(e)liken Gher(e)ken paschen vnd(e) Hinrick beneken . Im(me) dorpe to Auwdorp harde by / vnser Stad negest belegen eerlike vmberuchtede loͤffwerdige vnd(e) tuͤchwerdige frome me(n)ne / vnd(e) hebben in vnser Jegenwordich mit or(e)n vthgestreckeden armen vnd(e) vpgerichteden lijffliken / vingher(e)n stanedes eedes to den hiligen gesworen irtuget vnd(e) war(e) gemaket dat de Ernhafftige / her(e)n Bartold lange prester(e) wiser(e) disser scriffte . sy vnd(e) isz von Symon langen synem(en) / eeliken vader(en) vnd(e) Tilszeken syner eeliken naturliken moder(en) Echteͦ vnd(e) richte Dudesch vnde / nicht wendisch fryg vnd(e) nymandes eygen In vnd(e) vth eynem eeliken brudbedde nach anset=/tinge der hiligen cristen(e)n kerken vnd(e) guder cristen(en) mensch(e)n wonheid Eyn recht eekindt / der suluest Im(e) dorpe to Ouwdorp getelet vnd(e) gebor(e)n vnde de sulffte Er(e)n Bartold vnde / syne vorbeno(e)mde elder(e)n , ore handelinge vnd(e) wandelinge gehath vnd(e) geholden hebben . so / eerlike vmberuchtede loͤppwerdige frome me(n)schen billijk vnd(e) temelijk hebben vnd(e) holden / schollen So wy ok von on ander(es) nicht hebben irfar(e)n wen dat sie gulden wake ampte / vnd(e) ok eerlike broderscoppe vnd(e) sa(m)menuͤ(n)ge de sodann(e) eerlike vnd(e) lofftlike gebord temelike / handelinge vnd(e) wandelinge esschen . woll geweerd sÿn wuͦr v(m)me sodann(e) eerlike geboͤrd /lofflike handelinge vnd(e) temelike wandelinge angeseh(e)n Bidden wy Eynen J(e)derman den dise / vnse scriffte vorkomen gy dem(e) vpgenom(e)den Er(e)n Bartold In disen vnd(e) allen synen rechtuer=/digen saken gunstig fordelijk vnd(e) behulpen syn willen so vele billijck vnd(e) recht sy vordenen / wy alle tijd willichliken gherne vnde hebben des to Bekantnisse vnser Stadt Secret(um) / witliken hangen het(e)n an disen breeff Na cristi vnses her(e)n gebord virteynhundert Jar(e) dar / na Im(me) souen vnd(e) negentigestem(en) Jare Am(e) Middeweken na sunte Dionisij vnde syner gesel=/schop daghe /