Wie Otto vinzelberg Diderick brewitz Hans besendael Wilhelm wolter Diderick schuden Werner schermer Gherke rademyͤ(n) / Hinrick Milges Diderick boeck vnd(e) Hans berteldes Radmann(e) der olden Stad Soltwedel Bekenne(n) apenbar mit dusem brife / tugende vor vnsz vnse nachkamen vnd(e) sunderliken voralsuem(e) Dat wij recht vnd(e) redeliken vorkofft hebb(en) to eyne(m) rechte(n) / Erffkope vorkopen ock Jegenwardigen In Crafft duses briues In den Tynsen vn(de) rent(en) de vnser Stad alle Jarlikes tofal=/len vnd(e) geboren werden Dree Marck vnd(e) vier schilling Jarliker rent(en) vnser Stad weringe der Dogetzam Ilseben ze=/ligen hans rodenszee nhagelaten wedewe oren Eruen effte dem(e) hebb(er) dus(es) briues mit eren vnd(e) orer Eruen gude(n) wille(n) vor vieff vnd(e) Soestich Marck der suluen weringe de se vnsz gutliken vnd(e) wol todancke vornuget vnd(e) betalet heeffth / Duse Dree Marck pen(ning)e vnd(e) vier schilling Jarliker rent(en) schollen vnd(e) willen wie offte vnse nhakameden alle Jarli=/kes to vier tijden des Jares Alse to pasken to Sunte Johannis baptisten Dag(en) to Sünte Michaelis Dage vnd(e) to wi=/nachten to ichliker tijd der Erbonom(e)den Ylseben offte or(e)n medetoboscreuen drütteyenn schilling pen(ninge) der Erscreuen(e)n / weringe sunder lenger vortoch entrichten vnd(e) betalen Doch vnsz vnd(e) vnnsen nakamedenn den wedderkop der vyff / vnd(e) Soestich Marck pen(ninge) houetsu(m)men vnd(e) Dree Marck vnd(e) vier schilling pen(ninge) Jarliker rent(en) hir ann(e) toboholde(ne) / Alse wanner vnsz offte vnsen nhakamen Dat boquem(e) sy Denne moghen vnd(e) scholen wij der g(e)n(an)t(en) Ilszeben / offte or(e)n medetobescreuen sodan(e) vieff vnd(e) Soestich Marck pen(ninge) houetsu(m)men myt allen bedageden nhastelligen / rent(en) vull vnd(e) all entrichten vnd(e) botalen vnd(e) alsodenn(e) scholen vnsz vnd(e) vnsen nhakomeden sodan(e) Dree m(a)rck / vnd(e) vier schilling pen(ninge) Jarlike(r) rent(en) wedder qwid vnd(e) fryg vnd(e) dusse breeff machtloesz synn(e) Desz tobokant/nisse hebb(en) wij Vnser olden Stad Ingesegell witliken vnd(e) myt guden willen hangen heden an Disen brieff Na cristi vnses her(e)n gebord vierteynnhunderth Jar(e) Darnha Im(e) achte vnd(e) negentigesten Jar(e) am(e) dage der / Borth Sancti Johannis Baptiste /