In Godis namen amen . Wie Lodewich . van der gnade godis . Margreue tuͦ Brandenborch . vn(de) tuͦ Lusitz . Palantz bi deme Rine , Hertoge tuͦ Beẏeren . vnde vberste Camerer . des Hilgen Romes/chen Rikes . bekennen . vnde duͦn witlik . alle den . die dessen brief sen . oder horen . Dat wie durch lieue . vn(de) durch trvwe . vser gemeinen borgere . van Stendal . vn(de) sunderleken / durch die erfhuldinge . die sie vns gelouet . vn(de) sworen hebben . ewelken . vn(de) , truwelken . bi vns . vn(de) bi vnsen Eruen , tuͦ bliuende . al tuͦ hant an vs tuͦ kerende . na deme dode . der / Edelen ffurstinnen . agnesen . H(er)toginnen tuͦ Brunswich . vser lieuen medderen . vn(de) na deme dode . des Erbaren fursten . H(er)togen Otten van Brunsw(ich) . ires mannes . vses swageres / so hebbe wie . mit gudeme willen . vn(de) mit rade vser vrunt . den vorbenuͦmeden vsen borge(re)n van Standal . die nu sint . vn(de) die noch tuͦ komende sint . gegeuen , vn(de) bestedegen . en . in / dessen iegendw(er)den brieuen . alle die vriheit . alle die gnade . alle ire Recht . al ire len . al ir Erue . al ire guden wonheit . al ire eigen . geislik . vn(de) werlek . vn(de) alle dat sie . in Recht(e) were / hebben . an velde . an marke . in deme lande vn(de) in der stat tuͦ Stendale . vnde alle Redelke(n) stucke alse sie bewisen mogen . mit alden . oder mit nẏen brieuen , die en gegeuen sin . / van den ffursten . die vor vs . in deme furstenduͦm tuͦ Brandenborch gewesen sin . Ok geue wie vse vorbenuͦmede borge(re) . vn(de) alle(n) die in deme lande sin . vn(de) ok die von butene tuͦ ko/mende sin . vri . alles vnrechtes tollen . vn(de) geleides . vp wate(re) . vn(de) vp deme lande . Wie willen ok . vn(de9 gunnen , dat sie die Einunge halden , die sie tuͦ samene hebben gelouet . vn(de) sworen / mit deme lande . vn(de) mit den steden . in der marke . wie willen ok . dat iewelk man . he si , Ridder , knecht , oder boͦrger , scal bede nemen . alse sie die herscop nimt . wie ok / gerichte . hogeste oder sideste . vn(de) dienst heft . in deme lande, die en scal sine vndersate . mit deme dienste vn(de) Richte . tuͦ vnrechte nicht vorderuen , Wie scolen ok . breken . alle die / vesten , die gebuwet sin . in dat lant , na deme dode . des Edelen fursten . Marcgreuen Woldem(ar) . van brandenborch . vn(de) dat scole wie duͦn . mit rade . vn(de) . mit hulpe der stede in deme lande / Wie scolen ok laten . Riddere vn(de) knechte . bi ereme rechte . Borge(re) bi ireme rechte . vn(de) gebure bi ireme rechte . als et van aldere heft ¹ gestan . Wie enscolen ok . niemande scaden . sie tuͦ / hinderende . vn(de) beswerende . an ireme liue . an ireme gude . an iren luden . vn(de) . an ireme Rechte¹ . mit ienegeme vnrechte . woͦrd ok . ienich ridder . oder knape . van ienegem . vsen borge(re) / beclaget . vmme schulde . vor vseme lantrichte(re) den wie en setten . vn(de) die clage . vol richtet worde . also dat en pant gedielet worde deme clege(re) . vn(de) dat pant geweigert woͤrde . so scal / die clege(re) dat vor vs bringen . vn(de) wie scolen deme bieden vseme vogede . oder vseme ammechtmanne . dat he dat pant vtpande . Schege denne des nicht . so mach die cleger(e) / denne wol . sulk pant irvolgen . mit sulkeme rechte . dar die stat mede besat is . alse ere brieue spreken . vn(de) dat en scal denne weder vs nicht sin . Tu eime ewegen orkunde . / alle desser vorgescreuen dingen . so hebbe wie vsen vorbenuͦmeden boͤrge(re)n desen brief gegeuen . besegelt mit vseme ingesegele . Hir ouer sint gewesen . die Edelen lude . . greue / bertold von Henne(n)b(er)g . vn(de) greue Hinrik van swartzeborch . vse vrunt . Her seger die prouest van Stendal . vse ou(er)ste schriuer . H(er) bertold van buzt . H(er) Ghereko ¹ van kercowe . / Her Rokez . vse ridde(re) H(er)mann(e) van Luchow . vnde andere gude lude . Desse brief is gescreuen . vnde gegeuen . na der bort vses herren . Dusint iar . Drihundert iar . / vier vnde tvintich iar . Jn der hilgen Herren dage . sunte fabian(us) . vn(de) sebastian(us) . Dage . in vser stat tuͦ stendal .