We Ratmanne van stendal de hir na bescreuen / stan bekennen vnde betughen vor alden de dessen / brief sen vnde horen . Dat wẏ vsen truwen / borghe(re)n de beck(er)e sẏnt met vorrade vnde wlbort / vser klokesten borghe(re)n hebben ghe gheuen ene / ghulde vnde ene inni(n)ge met sodame rechte also / hir na bescreuen steẏt . To deme ersten male / so en scal neman dat becker(e) ambacht vͦnen¹ / in vser stat he en sẏ vse borgher vn(de) hebbe der / becker ghulde vnde ere inninge vnde ere werk / Vort mer en kẏnt des sẏn vader de ghulde / vor ghehat heft is it bederue deme scalme / gheuen de ghulde to der ersten morghen sprake / wanne it dar vmme biddit vnde scal gheue(n) / vor sinen anganc tuene scillinge . Dat ghelt // scal de stat vnde de ghulde like deẏlen ,, Vort/mer welk man der becker ghulde vor nicht ghe=/hat heft den scalme toghere(n) wan he bẏddet v(m)me / de ghulde want an de drudden morghen sprake / so scalme en vntfangen is he ane bose ruchte vn(de) / de scal gheuen vor sinen aneganc dre punt des / gheldes nẏmmet de stat tve punt vnde en punt / nẏmmet ere ghulde ,, heft eẏn man ock vm=/mu(n)deghe kindere wan he de ghulde wẏnt de / scolen der ghulde bruken like den de in der / ghulde boren sẏnt Vort mer de mestere / scolen den gheuen de vntfanghe ere werk / bringhen vppe de louen vor vns , vn(de) vor de rat=/manne vnde scole(n) dat betughen dat he hebbe / bouen syn werk ver punt penni(n)ge de scolen / sine² sine sẏn , vn(de) anderes nemendes , willen des / de ratmanne . nicht vntberen so scal he dat met / sẏneme ede war maken De mestere schun / ock betughen dat he ³ se ene hebben ghepruͮuet / vnde ver socht vor deme ove(n)ne dat se dat en=/kede weten dat he sẏnes werkes sẏeẏn mester / Vort mer eẏn becker de ⁴ dat ambacht vnen¹ wẏl / heft he anghelde achte punt penni(n)ghe eder mer / he sẏ in der ghulde ghebore(n) oder van butene in=/ghekomen , de scal alle weke in sẏme huse to den / minnesten hebben Eẏnen wẏspel an rocgen vnde / an mele De armen de mẏn wan achte punt heb=/ben de scolen enen haluen wẏspel alle weke heb=/ben an rocgen vnde an mele vnde de meste(re) // scolen dat alle v(er)teẏnnachte trvueleke be sen vinden / se iemende de dat nicht so en helde vnder eren ghul=/debrode(re)n de scal beteren mẏt ver scillingen Dat / ghelt scal de stat vnde ere ghulde like deẏlen Vort / mer vinden de ratmanne brot dat to weẏnich / is an lyuet grote vor , er dat de meste(re) vinden vnde / setten , so scal de ghene , des dat brot is bete(re)n met / vif scillingen den ratmanne(n) , vn(de) nicht den / meste(re)n , vnde vorsuͮmen dat de meste(re)⁵ so scal io ie=/welk mester der stat beteren met vif scilli(n)ge(n) / worde ock brot ghewnden dat ghevelschet were / an mele dat schun de ratmanne richten nach / der stat strenge recht vnde ordel ,, Vort mer / wan de wẏspel rocgen ghelt ene mark oder / mẏn so scal me backen ver brot vm eẏnen / pe(n)nig De wicht vnde de grote des brodes de / scal stan vnde wesen also als de Ratmanne dat / setten vnde beden , also als em dat redelichheẏt / wẏset vnde redeleke dunket vnde des schun / de Ratmanne wlle macht hebben wan se / willen Vort mer eẏn knecht de sẏnen here(n) / oder sẏne vrowen mit worde(n) ouel handelt / oder em brot , ghelt , oder ander gud stelet , vn(de) / vntfernet dat scal he beteren mit dren scil=/lingen . Dat ghelt scal de stat vnde ere ghul=/de like deẏlen Vort mer en becker de dre / knechte medet de scal de⁶ deme mest(er)e vor sẏn / lon gheuens sosteẏn scillinge . Deme andere(n) // knechte de vp den markede steẏt drutteẏn scillinge / Den middelsten knechte tuelf scillinge we dar an / brecket de scal bete(re)n mit ver scillinge(n) Dat ghelt / scal de stat vn(de) ere ghulde like deẏlen Vort mer / ere knechte de en scolen nicht vppe deme markede / oder bẏ deme markede , noch in den hokebuden do=/belen keghelw(er)pen , vnde nemende mit hore w(er)pen , / oder anders ouel handelen mit worden . welk knecht / dar anbrecket ⁷ de scal beteren mit dren scillinge(n) ,, / Dat ghelt scal de stat vnde ere ghulde like deẏ=/len . wolde he des nicht bete(re)n oder dat he des / nicht muͦchte bete(re)n so scal en an deme iare neme(n)t / an sẏme denste holden in vser stat ,, Sceghe ock / dat eẏnes beckers sone der selue(n) broke eẏ(n) hedde / so scal sẏn vader vor em den seluen broke gheue(n) / like deme knechte vnde dat selue recht liden an / sẏme sone , We och sẏnen ghulde broder mit wor=/den oder met w(er)ken ouel handelt datme moghe / bewẏsen mit tuen ghulde brodere(n) od(er) met dren / Dat scal he bete(re)n mit ver scillingen Dat / ghelt scal de stat vnde de ghulde like deẏlen / Ses morghe(n) sprake schun de becke(re) hebben in / eme iare dar schun se toladen tue Ratmanne(n) / dun se des nicht oder hebben se morghen sprake / oder ienich richte suan de Ratmanne wech gat / dat scal iewelk mest(er) bete(re)n der stat met / sessendruttich scillingen Vort mer eẏn iewelk / becker de scal eme iewelken mynschen enen // scepel rocgen oder meles de(n) he seluen in sẏme huse / sichtet vnde beredet backen vor anderhaluen penni(n)g(e) / Beredet dat de becker vnde sichtet so scalme em gheue(n) / tuer pennin(n)ge vnde scal dat brot backen na des min=/schen willen vnde begheringe also he best mach / Vort mer der becker wedewen de moghen⁸ na eres / mannes dode der becker ambacht vnen¹ de wile dat / se nenen ande(re)n man nemen ,, Der beckere mestere / schun ock dat vor stan suan dre hilleghe daghe mẏn / od(er) mer to sam(m)ene komen in ener weke , dat me de(n)ne / broders nuch veẏle vinde in der stat dat schun se / vliteken bewaren bẏ der stat kore De mestere / scolen ock dat vor stan . Dat alle weke tue becke(re) iewelk / io vif scillinguert semelen bereẏde worde dat vor/sumet dat scolen de meste(re) der stat bete(re)n mit vif / scillingen ,, We ock sẏne morghen sprake v(or)sumet wan / se em kundeghet is de scal bete(re)n met ses penni(n)gen / de beholt ere ghulde allene ,, Sceghe ock dat dat / erer ghulde brode(re) erlick sine morghen sprake to dren / stunden ver sumede sunder not vnde homodelke / wan em kundeghet w(er)e , de scal sine ghulde ver loren / hebben de scal he weder wẏnnen eset dat he seweder / hebben wil liker wis oft he ⁹ er vor nicht ne hat hedde / vnde wat he den ghift vor sẏnen aneganc des scal de / stat nemen tue del vnde de ghulde en ,, vnde , dit selue / recht scal ock gan ouer den de nicht wil horsam wesen / dessen stucken de hir ghescreuen stan in dessem breue // vort mer so schuͮn de becke(re) nene sunderleke louͮede / noch suͮnderleke setti(n)ge vnder sich setten vnde holde(n) / ane desse stucke vnde settinge de in dessen breue stan / vnde nene mer . ,, Deden se dat so scolet de Ratma(n)=/ne macht hebben ere ghulde neder to leggende wan / se willen sunderleke suͮan se ienighe settinge holde(n) / wolden de dar were to ieghen de stat Des we vs doch / nicht vermuden ,, Wolden ock de Ratmanne met / eren wisesten borghe(re)n dese stucke de in dessen breue / stan wandelen in en beter suant der stat euene que=/me , des schun de Ratmanne ock wl macht hebben wan / se willen ,, Vort mer nen becker vtwendich van / ande(re)n steden vnde van dorpen scal hir brot in woren / to verkopende ,, sunder in den iaremarkeden , vnde in der / pasche weke vnde in den marke daghen de bẏnnen / der weke komen De tẏd scal brot to verkopende / allermalkeme butene vnde bẏnnene vri sẏn Vort / mer we der beck(er) ghulde vnde werk heft de scal / backen wan he wẏl . vnde wo vele he wẏl vnde mach / suͦluen bẏ sẏme brode stan in sẏner scarne vnde verko=/pen , ane broke ,, vnde de beckere schun ghemeẏn=/leke temelik brot hebben vnde redeleck an reẏnich=/heẏt vnde witte also als oldẏnghes wente her to eẏn / loueleke wonheẏt hir is ghewesen De beckere / scolen ock ere ghulde meste(re) kesen wan de tẏd is / met der Ratmanne wlbort vn(de) wẏlle ,, Ock schun / der beckere meste(re) de des iares ghekoren werden // komen des neghesten vridaghes na sunte juriens daghe / vmbebodet to den Ratmannen , vp de louen , vnde sueren / vppen hẏlleghen dat so de stucke de in dessen breue / screue(n) stan , vnde also als desse brief heft , der stat / vnde erer ghulde to nuͮt vnde to vromen halden wẏlle(n) / ,, vnde dat se der¹⁰ stat vnde erer ghulde in al dessen stucke(n) / recht duͦn wẏllen also als hir stan bescreuen ,, Wẏe / ghunnen ock vsen becke(re)n dat se tve scharne vrẏ / hebbendar se den tẏns af beholden scolen , vnde de / dẏsche de halue(n) tẏns gheuen wat dar af velt dat / schun se half nemen vnde de ander helfte nimmet / de stat , Hir vmme schun de becke(re) ere scharne / suluen beteren wan des em not is Vort mer / welk becker ouer tver van siner stede de em van / der kauele vallen is de schal beteren , wan he dat / deẏt met ses penningen de schun se half hebben vn(de) de stat half ,, Vort mer eẏn becker de weẏte edd(er) / rocge dinget vnde koft , de schal sẏne ghulde brodere / de dar tokomen to mate mede laten anstan eset dat / se des begheren , Deẏt he des nicht so weddet he ver / schillinge der nẏmmet der stad tue schillinge vnde de / anderen tue nimmet ere ghulde ,, Ok mach eẏn / ghulde broder den anderen in erer morghen sprake / beklaghen vmme sẏne schulde vppe ver schillinge / vnde dat beneddene ¹¹ , bekent he is so schal he betale(n) / bẏnnen den verteẏnnachten deẏ ¹² he des nicht so weddet / he ver schellinge Dat ghelt schal de stat vnde ere / ghulde like deẏlen , To eẏner betughinge desses // vorbescreuen rechtes is vser stat grote ingheseghele / gheteẏkent to rugge met vseme mẏnnesten ingheseghe/le ghehangen an dessen bref . Dat is gheschen den Rat=/manne sẏnt gheweset Godeschalk van ẏerghow Reẏner / van kalue . Cort hẏdde Deneke noẏe Sander van vn=/gelincg(en) Hans bẏsmark Ghẏse wẏneke(n)s Arnt pordẏz / Beteke castel Heẏne vranke Heẏne schulte volce / noppowe Ghulde meste(r) sẏnt ghewesen Claus buntfelt / vnde Beteke volkestorp Desse bref is ghegheuen na / godes bort dritteẏnhundert iar jn deme enen vnde ver=/tighesten iare in deme vridaghe vor lẏchtmẏssen