In deme name(n) Ghodes , so si witlick , alden de dessen bref sen vnde horn , Dat we schepen , vnde Rad ghemeẏne , vortm(er) we gildemeste(re) vnde ghildebruͦde(re) ghemeẏne / vter wantsnider ghilde vt(er) wantmeker ghẏlde , vter kremer ghilde . vt(er) gherwer vnde der schomek(er) ghẏlde . vt(er) korsenwrecht(er) ghẏlde , vter knokenhow(er) / ghẏlde , vt(er) becker ghẏlde , vnde vortm(er) we borgher alghemeẏne , Rẏke vnde arm , in der stad to stendal , we betughen vnde bekennen openbar in desme bre=/ue, Dat we endreftleke vnde met eneme willen , vnde met eneme rade , met ghantser wlbort hebben , vtghesant , desse vrome bederue lude , de hir na be=/screuen stan , vse kvmpan , vnde vse borgher , vt vnser stad to stendal , van des rades weghen , Lemme kremer vnde woldenken van arneborh , van der wantsnid(er) / weghen vranken gholtbeken , van der wantmeker weghen alarde van doberkow vnde hanse osterborch , van der kremer weghen vranken bodeker , van / der gherwer vnde der schomeker weghen , mathias miltarde vnde henneke suechten , van der korsenwrechter weghen Ethgard hauen , van der knokenhower we/ghen , arnt gheẏlen vnde henneken bodincg , van der becker weghen heẏne swechten vnde hans ghussevelt . van vser meẏnen borgher(en) weghen , Hen(n)ing(e) van borstal / de schun dedinghen van vnser allerweghen vm den krich vmme den vnmut , vnde vm de twidracht vnde de schelinge , de vnder vs is , vnde hebben alle wl=/bordet vnde wilkoret vnde ghelouet , bi liue vnde bi ghude , allent dat desse vorbenumede lude dedinghen van vnser allerweghen , dat we alle vorbescreuen / borgher dat stede ghans vnde vast vnde vntebroken eweleke vnde vmm(er)mer holden willen , svnder allerleye bose list Dat loue we vnde dat wilko=/re we in ghuden truwen bi liue vnde bi ghude , als hir vorscreuen steẏt , Tho eẏner betughinge vnde wisheẏt desser vorbescreuen(en) dincg so hebbe we / schepen to stendal vor vns , vnde we Ratman to stendal vor vns vnde vor vnse meẏne borghe(re) to stendal , vnde vortm(er) alle we ghulde meste(re) vnde ghulde / brudere , van allen ghẏlden vorbescreuen met ghuden willen , an dessen bref vnse ingheseghel ghehangen , na ghodes bort . Drittenhundert iar , vif vnde vertich / iar Jn seͮnte brẏccijs daghe .