Wy Radman(n)e der(e) stad tho Stendal beke(n)nen in dessem(e) open(e) bryue dat wy med rade der alden Radman(nen) vnsen lyͤuen / truwen borgheren den wantmekeren in der(e) stad tho Stendal . desse stukke de hyrna gheschreuen staͤn toholdende in orer / ghulde gheorlouet vnde geghu(n)net hebben de wyle yd den Radma(n)nen behaghet lyk den anderen stukken de sy / alle Jare besweren de in oren ghulde bryue . staͤn Tho dem(e) yrstenmale , wuͦlle de ys geheyten , Clyppẏngk , Crasse=/wulle vlocken schorlẏngk vnde lynen vedeme ingheweuet wor desser vorbenoͤmeden stukken eyn , edder mer(e) / , edder sy alle in eynes wantmekers huͮs edder in synen weren ghevuͮnden werden , alse dat , ghevuͮnden wert , also / schalmen dat beͤrnen , des men dat med der stad ghesynde anverdyghet , waret ghevunden wert , Vortmer / eyn Jowelk ghemenghet swart laken , vnde eyn Jowelk gruͮn laken schal so ghuͮt syn dat yd vyff vyͤrdynghe / werdych sy , vnde dat warp to den swarten ghemengheden laken schalmen vp veruen in wede , nicht in der / swerte vnde wolk man swarte ghemenghede lakene maken wyl de schal de wuͤlle half in weͤde laten veruͮen / vnde we hiran bryckt de schal gheue(n) vyf schillynghe der stad vnde der gulde lyk todeyle(n)de , Ok schal Jowelk(e) roͤt laken vnde / Jowelk gheͤl laken so ghuͮt syn , dat yd eyner mark werdych sy vnde de roden laken(e) vnde ok de ghelen laken schole(n) ouer / al allenes syͤn ane eyn half verndel gharnes an dem(e) ende ofte ys noͤt wer , Vnde we daran bryckt de schal der stad vnde / der gulde gheuen vyf schillinghe lik to deylende , Vortm(er) bruͮnickes laken scholen ouer al allenes syͤn vnde de wytten lake(n) / scholen ouer al allenes syn ane twe ellen an eyne(n) ende oft des noͤt wer vnde dat schalme to vorne den segghen , de / dat laken koͤpt wyͤ daran bryckt de schal der stad vnde der gulde bete(re)n med vyf schillinghen lik to deylende , wyͤt warp / , dat blaw edder graw werden schal , dat schalmen nicht maken an der werpte , Vortmer nyme(n)t schal weͤt kopen dat / en sy yrst gheprouet vnde schal des nicht to sik nemen he en weͤte euͮene wo he dat ghelden schole we daran bryckt / de schal dat beteren med vyf schillinghe der stad vnde der gulde lik todeylende , ok schal nyme(n)t wuͤlle edder warp / kopen , er men mysse luͤdt hyͤ sy vnse borgher edder nycht , we dat deyt de schal bete(re)n der stad vnde der gulde med / vyf schillynghen lyk todeylende , ok scholen orer twe nicht warp kopen de in eyne(n) broͤde synt , vnde nyme(n)t schal / med den vntzel weghen warp edder wuͮlle , wen de tolner we daran bryckt de schal der stad vnde der gulde / bete(re)n med vyf schillynghen lik to deylende , ok schal nyme(n)t Roͤde kopen sy en werde em gheantw(er)dert to des / verweres huͮs dar de waghen synt , we hiran bryckt , dy de gulde het , de schal der stad vnde der guͤlde beteren / med dren schillinghe lik todeylende , ok schal des nachtes in der stad to stendal nyme(n)t wulle slan by vyf schil=/lynghe(n) de scholen de stad vnd(e) de gulde like deylen , vnde we der wa(n)tmeker gulde beghe(re)t towy(n)nede vnde in ore / gulde nicht ghebo(r)en ys , de schal der stad gheuen eyne m(a)rk vnde ses schillinghe vnde desse vorgena(n)te artikel vnde / stukke scholen den stukken vnde artikele(n) tohulpe kome(n) de sy hebben in ore(n) gulde bryͤue van der stad weghen / dewile dat de Radma(n)ne willen , vnde scholen den gulde bryͤue nenerleye wys hynde(re)n , jn eyner tuͮchnysse desser / dẏng hebbe wy vnser stad cleyne jngheseghel an dessen bryff laten henghen na ghodes bort drutteyͤn / huͤndert jar in dem(e) vyͤr vnde veftighesten jare in sunte vale(n)tin(us) daghe des hilghen merteleres